Irlandiyada amaldagi davlat rahbari Maykl Higginsning o‘rnini egallaydigan mamlakatning 10-prezidentini aniqlab beruvchi saylov bo‘lib o‘tdi. Ovozlarni sanash jarayoni hali tugallanmagan bo‘lsa-da, barcha okruglardan kelgan ma’lumotlar Konnollining katta ustunlik bilan g‘alaba qozonganini ko‘rsatmoqda.

Ayni paytda u 64 foiz ovoz to‘plagan bo‘lsa, raqibi Fine Gael partiyasi vakili Hizer Hamfris 28 foiz bilan undan ancha ortda bormoqda. Hamfris allaqachon raqibasini g‘alaba bilan tabrikladi.

“Ketrin barchamiz uchun prezident bo‘ladi. U mening ham prezidentim bo‘ladi va men unga chin qalbdan eng ezgu tilaklarimni izhor etaman”, – degan u.

O‘zi tug‘ilgan Goluey grafligida nutq so‘zlagan Konnolli dastlabki natijalar uni “nihoyatda quvontirganini” ta’kidlab o‘tgan.

Ma’lumot uchun, Ketrin Konnolli mustaqil siyosatchi hisoblanadi. Uni bir qator so‘l partiyalar, jumladan, Sinn Fein ham qo‘llab-quvvatladi. U 2016-yildan beri Irlandiya parlamentida faoliyat yuritmoqda, undan oldin esa psixolog va advokat sifatida ishlagan.

Ma’lumot uchun, Irlandiya parlament respublikasi hisoblanadi va vakolatlarning aksariyati deputatlar katta qismiga tayanadigan hukumatga tegishlidir. Prezident yetti yillik muddatga saylanadi va asosan rasmiy marosimlarni bajaradi.

• Irlandiya
• Prezident
• saylov