“Qo‘shma Shtatlar prezidentining maxsus vakili Stiv Uitkoffning 2-martda yakunlanadigan sulhning birinchi bosqichini uzaytirish bo‘yicha taklifi isroillik asirlarning yarmini birinchi kunning o‘zida ozod qilishni nazarda tutadi. Qolgan asirlar esa doimiy o‘t ochishni to‘xtatish bo‘yicha kelishuvga erishilgach ozod qilinishi kerak”, – deb xabar bermoqda The Times of Israel.

Xabarga ko‘ra, ushbu kelishuv Ramazon oyining oxiri — 29-mart va Pasxa bayramining oxiri — 19-aprelgacha uzaytiriladi. Isroil rasmiylarining ta’kidlashicha, XAMAS hali Uitkoffning rejasini qabul qilmagan.

“Agar XAMAS o‘z pozitsiyasini o‘zgartirsa, Isroil ushbu rejaga doir barcha tafsilotlar bo‘yicha muzokaralarni darhol boshlaydi”, – deyiladi Isroil hukumati bayonotida.

Bayonotda dastlabki kelishuvga ko‘ra, agar muzokaralar samarasiz deb topilsa, Isroil 1-martdan keyin harbiy harakatlarni davom ettirish huquqiga ega ekanligi eslatib o‘tilgan.

Netanyaxu idorasi XAMAS sulh kelishuvini bir necha marta buzganini, Isroil esa uni to‘liq bajarayotganini ta’kidlagan. Shuningdek, XAMAS ham Isroilni shartnoma bandlariga rioya qilmaganlikda ayblagan.

• AQSh
• Falastin
• Isroil
• shartnoma