Isroil armiyasi Eronning Isfaxon viloyati yaqinida portlashlar sodir bo‘lgani haqidagi xabarlarga izoh berishdan bosh tortdi.

“Anadolu” agentligi muxbirining Erondagi portlashlar haqidagi savoliga Isroil armiyasi vakili “hozircha bu masalaga izoh bermayapti”, deb javob bergan.

Armiya departamenti matbuot xizmati aholi uchun xavfsizlik bo‘yicha ko‘rsatmalarga hali hech qanday o‘zgartirish kiritilmaganini ta’kidlagan.

Avvalroq Eron OAVlari mamlakat Harbiy-havo kuchlari bazasi joylashgan Isfaxon viloyati shimoli-sharqida portlashlar gumburlagani haqida yozgan edi.

Qayd etilishicha, portlashlar gumburlagani haqidagi xabarlardan so‘ng Tehron, Isfaxon, Sheroz shaharlari va qator viloyatlarda parvozlar to‘xtatilgan.

Amerika matbuoti AQSh rasmiylariga tayanib, Isroil Eron hududiga hujum uyushtirganini yozgan.

• Eron
• Isroil