Isroil nazoratidagi Golan tepaliklaridagi qishloqqa raketa hujumi uyushtirilgan. Oqibatda esa kamida to‘qqiz kishi halok bo‘lgan.

Isroil Tashqi ishlar vazirligining xabar berishicha, Livanning “Hizbulloh” guruhi tomonidan otilgan raketa Isroil nazorati ostidagi Golan tepaliklari hududidagi Majdal Shams qishlog‘idagi futbol maydoniga kelib tushgan.

Shundan so‘ng, Isroil bosh vaziri Binyamin Netanyaxu: “Isroil Golan tepaliklariga qilingan hujumni javobsiz qoldirmaydi, “Hizbulloh” harakati buning uchun juda katta tovon to‘laydi”, — deya fikr bildirgan.

Isroil Tashqi ishlar vaziri Golan tepaliklariga berilgan zarbadan so‘ng, “Hizbulloh” barcha qizil chiziqlarni kesib o‘tganini aytgan va “Hizbulloh” hamda Livan bilan keng ko‘lamli urush boshlanishidan ogohlantirgan.

Shuningdek, Livan bilan urushni oldini olish uchun oxirgi imkoniyat “Hizbulloh” kuchlarini olib chiqib ketish ekanligini ta’kidlagan.

Livan hukumati esa Golan tepaliklarida tinch aholiga qilingan hujumni qoralagan va barcha tomonlarni zudlik bilan o‘t ochishni to‘xtatishga chaqirgan.

• Binyamin Netanyaxu
• Isroil
• Livan