AQSh, Fransiya, Germaniya, Britaniya va Italiya yaqin bir necha hafta ichida Isroil va Livan “Hizbulloh” harakatining Isroil-Livan chegarasida tinchlikni tiklashga qaratilgan bir qator majburiyatlarini e’lon qilishga umid qilmoqda.

“Yangi kelishuvlar tomonlar tomonidan imzolanmaydi, lekin AQSh, Britaniya, Fransiya, Germaniya va Italiya har bir tomon o‘z zimmasiga olishga rozi bo‘lgan majburiyatlarni batafsil bayon qiladigan bayonot chiqaradi”, – deyiladi bayonotda.

Ma’lumotlarga ko‘ra, majburiyatlar BMT xavfsizlik Kengashining 2006-yildagi 1701-sonli qarorini qisman amalga oshirishga yo‘naltirilishi kutilmoqda.

Ta’kidlanishicha, majburiyatlardan biri chegaradagi to‘qnashuvlarni to‘xtatishni o‘z ichiga oladi. Manbalarga ko‘ra, “Hizbulloh” kelishuvlar doirasida o‘z kuchlarini Isroil chegarasidan 8-10 kilometrga ko‘chirishi kerak, Livan armiyasi esa chegara hududlariga 10-12 ming harbiy yuboradi.

Xabarda yozilishicha, AQSh Isroildan Livan havo hududida o‘z qiruvchi samolyotlarining parvozlarini to‘xtatishni so‘ragan. Tel-Aviv bu taklifni rad etmagan. Shu bilan birga, manbalarga ko‘ra, Isroil ham kuchlarning bir qismini – asosan zaxiradagi odamlarni chegara hududlaridan olib chiqishga majbur bo‘ladi.

Bundan tashqari, AQSh, Fransiya, Germaniya, Britaniya va Italiya Livan iqtisodiyotini mustahkamlashga qaratilgan iqtisodiy chora-tadbirlarni e’lon qiladi.

Livan janubidagi vaziyat 2023-yil oktyabr oyida Isroilning G‘azo sektoridagi harbiy harakatlari boshlanganidan keyin keskinlashdi. Isroil armiyasi va Livan “Hizbulloh” harakati jangchilari har kuni chegara bo‘ylab bir-birlarining pozitsiyalarini o‘qqa tutmoqda.

• Falastin
• Isroil
• Livan