Isroil aviatsiyasi 20-iyul kuni Yaman g‘arbidagi Hudayda port shahriga hujum uyushtirdi. Bu haqda Al Arabiya nashri ma’lum qildi.

Manbada aytilishicha, hujumlar asosan neft inshootlariga qaratilgan. Hudayda shahriga yaqin neft omborlari va elektr tizimlari portlatilib, vayron qilingan.

Hujumda Isroil harbiy-havo kuchlarining 12 ta jangovar samolyoti, jumladan, beshinchi avlod F-35I Adir qiruvchi samolyotlari ishtirok etgan.

Netanyaxu Yamanning Hudayda portiga hujumni husiylarning Tel-Avivga dron hujumi va boshqa yuzlab hujumlariga to‘g‘ridan-to‘g‘ri javob deb atagan.

Isroil bosh vazirining so‘zlariga ko‘ra, Hudayda porti harbiy maqsadlarda, jumladan, Eron qurollarini olib kirishda foydalanilgan.

“Isroil har qanday yo‘l va vositalar bilan o‘zini himoya qiladi, unga hujum qilganlar juda katta tovon to‘laydi”, — deya qo‘shimcha qilgan Netanyaxu.

Shuningdek, husiylar rasmiylari Isroil hujum uchun katta badal to‘lashini bildirgan. “Qasos zarbasi” og‘ir bo‘lishi, Isroilni himoya qilishga uringanlar ham ayab o‘tirilmasligi aytilgan.

Bir qancha Yaqin Sharq arab nashrlari Isroil hujumlari Hudaydadan boshqa Yaman hududlarida ham davom etayotganini bildirgan. Ijtimoiy tarmoqlarda tinch aholi turar joylariga qilingan hujum tasvirlari ham paydo bo‘lmoqda.

• Binyamin Netanyaxu
• Isroil
• Urush
• Yaman