Isroil qo‘shini tomonidan G‘azo sektorining turli hududlarida uyushtirilgan hujumlarda 13 nafar falastinlik halok bo‘ldi, aksariyati bolalar va ayollar bo‘lgan o‘nlab insonlar yaralandi. Bu haqda “Anadulu” xabar berdi.

Qayd etilishicha, Falastinning “WAFA” rasmiy axborot agentligi xabariga ko‘ra, Isroil harbiy samolyotlarining G‘azo sektori janubidagi Xon Yunus shahridagi uyni bombalashi oqibatida 12 kishi halok bo‘lgan va ko‘plar yaralangan.

Hujum ortidan qulagan binoda mahalliy aholi va fuqarolik mudofaa guruhlari qidiruv-qutqaruv ishlarini davom ettirmoqda. Isroil armiyasining G‘azo sektori shimolidagi Jebaliya qochqinlar lagerida joylashgan “Saad bin Abi Vaqqas” masjidini o‘qqa tutishi natijasida bir ayol halok bo‘lgan, o‘nlab insonlar, asosan bolalar va ayollar yaralangan.

Isroil jangovar samolyotlari ham G‘azoning turli qismlarida bir necha nuqtaga zarba berib, o‘lim va jarohatlarga sabab bo‘ldi.

Isroilning G‘azo sektoriga qilgan hujumlarida 7-oktyabrdan beri 32 552 falastinlik, jumladan, kamida 14 280 bola va 9 340 ayol halok bo‘lgan yana 74 980 nafari yaralangan.

• Falastin
• Samolyot
• hujum