Janubiy Koreyaning Madaniyat, sport va turizm vaziri Xvan Xi BTS guruhi yigitlarini majburiy harbiy xizmatdan ozod qilish uchun tegishli qonunga oʻzgartirishlar kiritishni taklif etdi.

Majburiy harbiy xizmat haqidagi qonunga koʻra, 18 yoshdan 28 yoshgacha boʻlgan erkaklar 20 oy mobaynida majburiy harbiy xizmatni oʻtashlari kerak. Vazirning fikricha, pop yulduzlar “sanʼat sohasi vakillari” sifatida harbiy xizmatga bormasliklari mumkin.

“Ommaviy madaniyat va sanʼat sohasi vakillarini ushbu yoʻnalish xodimlari sifatida qayd etadigan tizimni yaratish vaqti keldi”, deydi Xvan Xi.

2020 yilda Janubiy Koreyada tegishli qonunga k-pop yulduzlari uchun majburiy harbiy xizmat yoshini 30 gacha uzaytirishga imkon beruvchi oʻzgartirishlar kiritilgan edi. BTS guruhi vakillaridan biri Kim Sok Jinu dekabr oyida 30 yoshni qarshilaydi. Agar vazir tomonidan taklif etilgan fikrlar inobatga olinmasa, u majburiy harbiy xizmatni oʻtash uchun yoʻlga chiqadi.

Janubiy Koreyaning Buyuk Britaniyadagi elchisi Gann Kim esa koreyaliklarning aksariyati BTS guruhi yoshlar uchun oʻrnak hisoblanishi, shu sababli ham guruh vakillarining harbiy xizmatga borishlarini koʻpchilik intiqlik bilan kutayotganini aytib oʻtgandi.

• Janubiy Koreya
• San’at
• Shou-biznes
• mashhurlar