Buyuk Britaniya hukumati Ilon Maskka tegishli X ijtimoiy tarmog‘iga nisbatan keskin choralar ko‘rishi mumkin. Bunga platformadagi sun’iy intellekt – Grok orqali ayollar va bolalarning suratlarini jinsiy mazmunda o‘zgartirish bilan bog‘liq mojaro sabab bo‘lmoqda. Bu haqda The Telegraph xabar bermoqda.

Britaniya Fan, Innovatsiyalar va texnologiyalar vaziri Liz Kendallning aytishicha, mamlakat media regulyatori Ofcom X platformasiga nisbatan bir necha kun ichida choralar ko‘rishi mumkin.

Buyuk Britaniya Bosh vaziri Kir Starmer Ofcom’dan mamlakatda qariyb 20 million foydalanuvchiga ega bo‘lgan X’ni bloklashdan avval platformaga nisbatan qanday choralar ko‘rish mumkin bo‘lsa, hammasini ko‘rib chiqishni so‘ragan.

So‘nggi paytlarda X foydalanuvchilari Grok sun’iy intellektidan foydalangan holda haqiqiy ayollarning, jumladan, siyosatchilar va mashhurlarning suratlaridan kiyimlarini olib tashlashni so‘rab murojaatlar qilgan. Britaniya internet nazoratchilari bunday tasvirlarning ayrimlari darknetda tarqalib, bolalarga nisbatan jinsiy zo‘ravonlik materiallari toifasiga kirishini ma’lum qilgan.

Ilon Mask o‘zining Grok nomli sun’iy intellekt chat-boti bilan bog‘liq mojaroni yumshatish maqsadida ushbu xizmatni faqat pullik obunachilar uchun qoldirgan. Biroq Britaniya hukumati bu yetarli emasligini bildirmoqda.

“Ayollar va bolalarning tasvirlarini jinsiy maqsadda o‘zgartirish jirkanch va mutlaqo qabih holatdir. Agar pul to‘lansa, Grok bunga hali ham ruxsat berayotgani haqoratli va mutlaqo qabul qilib bo‘lmaydigan hol. Men Ofcom parlament bergan barcha huquqiy vakolatlardan foydalanishini kutaman”, – deydi Texnologiyalar vaziri Liz Kendall.

• Buyuk Britaniya
• Ijtimoiy tarmoq
• taqiq