Volodimir Zelenskiy va Donald Tramp Ukrainani keyingi o‘n yil ichida tiklash uchun 800 milliard dollar jalb etishni nazarda tutuvchi “farovonlik” shartnomasini imzolashi mumkin. Bu haqda The Telegraph G‘arb rasmiylariga tayanib xabar berdi.

Nashrga ko‘ra, Ukraina va AQSh prezidentlari 19–23 yanvar kunlari Davosda bo‘lib o‘tadigan Jahon iqtisodiy forumi doirasida yakuniy kelishuvga erishishi kutilmoqda. Dastlab Zelenskiy Oq uyga tashrif buyurib, AQSh bilan iqtisodiy farovonlik rejasi hamda urushdan keyingi xavfsizlik kafolatlari bo‘yicha shartnoma imzolashni rejalashtirgan edi. Biroq Yevropadagi ittifoqchilar Tramp bilan uchrashuv uchun eng maqbul maydon sifatida Davosni taklif qilgan.

The Telegraph ma’lumotiga ko‘ra, farovonlik rejasi o‘tgan bahorda tuzilgan foydali qazilmalar bo‘yicha kelishuvga asoslanadi. Ushbu bitim kelajakda amerikalik investorlarga Ukrainadagi tog‘-kon loyihalarida ishtirok etish uchun imtiyozlar berishni ko‘zda tutadi. Kiyev rasmiylari Vashingtonni Ukrainani urushdan keyingi tiklashga jalb etish Trampni ishonchli xavfsizlik kafolatlarini taqdim etishga undaydi, deb hisoblamoqda.

Shu bilan birga, nashr manbalarining ta’kidlashicha, Tramp Rossiya prezidenti Vladimir Putindan tobora ko‘proq norozi bo‘lib bormoqda va uni Ukrainadagi tinchlikka Zelenskiydan ko‘ra katta to‘siq sifatida ko‘rmoqda. Putin «shunchaki vaqtni cho‘zayotgani» tufayli Tramp ma’muriyatidagilarning pozitsiyasi Yevropa bilan tobora yaqinlashib bormoqda. Moskvaning muzokaralardagi “ikki qadam oldinga, bir qadam orqaga” strategiyasi esa Trampni charchatgani aytilmoqda.

• AQSh
• Putin
• Rossiya
• Tramp
• Ukraina
• Zelenskiy