31°
Kechasi 18°
Bosh prokuratura Karate federasiyasining sobiq rahbarlari va boshqa mansabdor shaxslariga nisbatan jinoiy ish qo‘zg‘atdi.
Ular hujjatlarni qalbakilashtirish va o‘ta yirik miqdorda byudjet mablag‘larini o‘zlashtirishda ayblanmoqda.
O‘zbekiston karate milliy federasiyasining sobiq rahbarlari hujjatlarni qalbakilashtirish va ayniqsa katta hajmdagi byudjet mablag‘larini o‘zlashtirishda ayblanmoqda. Bu haqda Korrupsiyaga qarshi kurash agentligi matbuot xizmati xabar berdi.
Agentlikning ma’lum qilishicha, federasiya prezidenti Nurxon Nafasovning tashkilot sobiq rahbarlari xatti-harakatlaridan norozi bo‘lib Korrupsiyaga qarshi kurashish agentligiga yo‘llagan murojaati hamda ijtimoiy tarmoqlarda keng muhokamalarga sabab bo‘lgan federasiya faoliyati bilan bog‘liq korrupsion holatlar agentlik tomonidan o‘rganib chiqilib, uning yakunlari bo‘yicha to‘plangan hujjatlar qonuniy baho berish uchun Bosh prokuraturaga taqdim etilgan edi.
Ushbu hujjatlar asosida Bosh prokuraturaning boshqa mutasaddi idoralar bilan o‘tkazgan tekshiruvlari natijasida O‘zbekiston karate milliy federasiyasi mansabdor shaxslari va boshqalar rasmiy hujjatlarga soxta yozuv kiritib, juda ko‘p miqdordagi byudjet mablag‘larini talon-toroj qilganligi ma’lum bo‘ldi.
Xususan, 2020−2021 yillarda o‘tkazilgan 10 ta o‘quv yig‘inlarida 49 nafar sportchi amalda qatnashmagan hamda mehmonxona xizmatidan foydalanmagan bo‘lsa-da, ishtirok etganligi haqida soxta hujjatlar rasmiylashtirilib, 403 mln so‘mlik byudjet mablag‘lari o‘zlashtirib yuborilgan.
Sportchilar tomonidan ishlatilmagan 64 turdagi 78,5 mln so‘mlik dori vositalari ham talon-toroj qilingan.
Shuningdek, sport zal ijaraga olinganligi to‘g‘risida hujjatlar rasmiylashtirilib, 128 mln so‘m mablag‘lar amalda sport zaliga ega bo‘lmagan mehmonxonaga o‘tkazilib, o‘zlashtirilgan.
Shu kabi 2021-yilda o‘tkazilgan 3 ta sport musobaqalari qatnashuvchilari tomonidan to‘langan 150 mln so‘m badal pullari kirim qilinmagan.
Bundan tashqari, me’yoriy hujjatlar talabalariga zid ravishda karate bo‘yicha jahon chempioni Doston Otabolayevga trenerlik qilmagan U. B.ga davlat byudjetidan asossiz ravishda 6 ming AQSH dollari to‘lanishiga erishilib, byudjet mablag‘lari o‘zlashtirilgan.
Mazkur holat yuzasidan federasiya mansabdor shaxslari va boshqa shaxslarga nisbatan Jinoyat kodeksining 167-moddasi 3-qismi (O‘zlashtirish yoki rastrata yo‘li bilan talon-toroj qilish) va 228-moddaning 2-qismi (Hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) bilan jinoyat ishi qo‘zg‘atilgan.
2019-yilning yanvarida Milliy olimpiya qo‘mitasi Milliy karate federasiyasining sobiq raisi Nurxon Nafasov to‘rtinchi bor jinoiy javobgarlikka tortilgani haqida xabar berganedi. Keyinroq Bosh prokuratura MOQning uni o‘zlashtirish va tovlamachilikda ayblanayotgani haqidagi bayonotini rad etdi. Nurxon Nafasov sud orqali MOQning uni ishdan bo‘shatish haqidagi qarori bekor qilinishiga erishdi va 2020-yil oktyabr oyida federasiya rahbari lavozimiga tiklandi.
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
