Osiyo o‘yinlari. O‘zbekiston Saudiyani yirik hisobda yengdi.

Ravshan Haydarov bosh murabbiyligidagi jamoa turnir yarimfinaliga chiqdi va final yo‘llanmasi uchun bahsda KXDR va Yaponiya jamoalari o‘rtasidagi to‘qnashuv g‘olibiga qarshi maydonga tushadi.

Osiyo o‘yinlari. Chorakfinal

O‘zbekiston – Saudiya Arabistoni 3:0

Gollar: Dilshod Murtazoyev (12), Azizbek To‘lqinbekov (78), Firdavs Abdurahmonov (86).

O‘zbekiston – Samandar Muratbayev, Saidxon Hamidov, Dilshod Murtazoyev, G‘iyos Rizaqulov (Dilshod Abdullayev, 81), Quvonch Xushvaqtov, Sardor Bahromov (Firdavs Abdurahmonov, 81), Saidumar Saidnurullayev (Ollobergan Karimov, 62), Muhammadali O‘rinboyev (Nurlan Ibraimov, 85), Asilbek Jumayev (Shodiyor Shodiboyev, 85), Azizbek To‘lqinbekov, Ro‘ziboy Fayzullayev.

Yaponiya mezbonligida bo‘lib o‘tayotgan Osiyo o‘yinlarining futbol bo‘yicha turnirida O‘zbekiston jamoasi o‘z yurishini muvaffaqiyatli davom ettirdi.

Ravshan Haydarov shogirdlari chorakfinalda Saudiya Arabistoni vakillariga qarshi maydonga tushib, yirik hisobda g‘alaba qozondi.

O‘yinning 12-daqiqasida Sardor Bahromov jarima zarbasini ijro etdi, raqib darvozaboni to‘pni qaytardi, ammo unga birinchi bo‘lib Dilshod Murtazoyev yetib keldi va hisobni ochdi.

Ikkinchi bo‘lim davomida o‘zbekistonliklar hisobdagi ustunlikni oshirdi. Avvaliga 78-daqiqada Ro‘ziboy Fayzullayev tomonidan amalga oshirilgan qarshi hujumni Azizbek To‘lqinbekov gol bilan yakunladi.

86-daqiqada esa Firdavs Abdurahmonov o‘ng qanotdan oshirilgan to‘pni boshi bilan darvozaga yo‘llab, yakuniy hisobni o‘rnatdi – 3:0.

O‘zbekiston guruh bosqichini ham 100 foizlik natija bilan yakunlagandi. 1-turda Filippin 5:1 hisobida dog‘da qoldirgan, 2-turda ozchilik bilan o‘ynab, Quvayt ustidan 2:0 hisobida g‘alaba qozonilgan, 3-turda esa Vetnam ham shu hisobda taslim etilgandi.

Endi ushbu jamoa yarimfinalda Yaponiya - KXDR juftligi g‘olibiga qarshi o‘ynaydi.