Koʻzlar – odamning maʼlumot qabul qilish jarayonida faol ishtirok etuvchi tana aʼzolaridir. Siz ortiqcha eʼtibor qaratmaydigan ayrim odatlar oxir-oqibatda koʻzlar salomatligiga jiddiy zarar yetkazadi, ayrim holatlarda koʻrish qobiliyatining butunlay yoʻqotilishiga olib keladi.
Bunday holatning oldini olish uchun eng avvalo zararli odatlardan xalos boʻlish lozim. Boisi, kasallikni davolagandan koʻra, uning oldini olish osonroqdir.
Koʻzlarni qoʻl bilan ishqalash
Koʻzlarni qoʻl bilan bosib ishqalash koʻzning bosim taʼsirida qolishiga sabab boʻladi. Bundan tashqari, qoʻllar toza boʻlmagan holatda teri yuzasidagi bakteriyalar koʻzning shilliq qavatiga tushadi va yalligʻlanish jarayonini keltirib chiqaradi.
Yaroqlilik muddati oʻtgan kosmetikadan foydalanish
Kosmetik vositalarni qadoqda koʻrsatilgan yoʻriqnomaga binoan saqlash kerak. Yaroqlilik muddati oʻtganidan keyin esa ulardan foydalanish mutlaqo mumkin emas. Koʻz atrofidagi soha uchun moʻljallangan kosmetik vositalarni sotib olishda esa tejamkorlik qilmagan maʼqul.
Pardoz bilan uxlash
Pardoz bilan uyquga yotish nafaqat yuz terisi, balki koʻzlar salomatligiga ham zarar yetkazadi. Har kuni uyquga yotishdan avval pardozingizni ehtiyotkorlik bilan tozalab oling, yoʻqsa boʻyoq zarralari koʻzning shilliq qavatiga tushib qolishi mumkin. Bu esa oʻz-oʻzidan yalligʻlanishga sabab boʻladi.
Linza bilan uxlash
Bugungi kunda kontakt linzalar har qachongidan ham ommalashgan. Ammo, ularni uzluksiz ravishda taqib yurish mumkin emas. Koʻzlar vaqti-vaqti bilan linzadan dam olishi kerak, ularni yechgandan soʻng maxsus suyuqlik ichiga solib qoʻying. Hech qachon past sifatga ega arzon linza sotib olmang, uni yechmasdan turib uxlashga yotish koʻz kasalliklarini keltirib chiqaradi.
Quyoshdan himoya qiluvchi koʻzoynakdan voz kechish
Koʻzlarni quyosh nurlaridan himoya qiluvchi koʻzoynakni yilning toʻrt faslida taqish kerak. Quyosh nurining koʻzlarga toʻgʻridan-toʻgʻri tushishi oqibatida jiddiy kasalliklar kelib chiqishi mumkin.
Kompyuter taʼsiridan himoyalanmaslik
Agar kun boʻyi kompyuterda ishlashingizga toʻgʻri kelsa, kun oxiriga kelib koʻzlaringiz qurib qolishi tayin. Tadqiqotchilar kun boʻyi kompyuter qarshisida oʻtirib ishlash koʻzning shoh pardasiga zarar yetkazishi va koʻrish qobiliyatining yomonlashishiga sabab boʻlishini isbotlab berishgan.
Buning oldini olish uchun oftalmologlar “20-20-20” qoidasidan foydalanishni maslahat berishadi. 20 daqiqa vaqtni kompyuter qarshisida ishlab oʻtkazganingizdan keyin nigohingizni 20 qadam narida turgan biror buyumga qarating va ushbu holatni 20 soniya davomida saqlab turing. Ushbu mashq koʻzlardagi bosimni kamaytirishga yordam beradi.
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!