Ayni kunlarda O‘zbekistonda koronavirus bilan kasallanganlar soni ko‘payayotganining sababi ma’lum qilindi. Bu haqda AOKAda o‘tkazilgan brifingda Nurmat Otabekov ma’lum qildi.

Qayd etilishicha, 23-noyabr holatiga ko‘ra koronavirus bilan kasallanganlar soni 245 ming 665 nafarni tashkil etib, ulardan 243 ming 234 nafari (99,1 foiz) sog‘aygan, 1 637 nafari (0,6 foiz) vafot etgan.

So‘nggi haftada stasionarga yotqizilgan bemorlar soni 482 nafar, davolanib chiqqanlar soni 358 nafar, karantinga olinganlar 2 ming 310 nafar va karantindan chiqarilganlar esa 1 306 nafarga yetgan bo‘lsa, hozirda koronavirusni davolashga ixtisoslashgan shifoxonalarda 539 nafar bemorlar mavjud va uy sharoitida davolanayotganlar 187 nafarni tashkil etmoqda.

So‘nggi 14 kunlik tahlilda kasallikning tarqalganlik darajasi 2 ni tashkil etmoqda. JSST ekspertlari xulosasiga ko‘ra bu ko‘rsatkich 1 gacha bo‘lsa, vaziyat barqarorligini anglatadi.

Respublikada virus genomini o‘rganish bo‘yicha o‘tkazilgan so‘ngi tahlillarning barchasida “omikron” shtammining “Stealth-Omicron” BA.5 varianti aniqlangan.

O‘zbekistonda ham gripp va o‘tkir respirator infeksiyalar 2022-2023-yillar kuz-qish mavsumida koronavirus infeksiyasi bilan miks-infeksiya kasalligi sifatida, aynan emlanmagan aholi hamda surunkali kasalliklari mavjud bo‘lgan fuqarolar o‘rtasida qayd etilishi kuzatilayotgani ta’kidlangan.

Shuningdek, emlash tadbirlari uchun jami 73 mln doza vaksina olib kelingan va uning 27,6 mln dozasi O‘zbekistonda ishlab chiqarilgan.

2022-yil 22-noyabrga qadar jami 72,3 mln doza vaksina ishlatilgan. Birinchi doza bilan emlanish ko‘rsatkichi emlanishi rejalashtirilgan qatlamga nisbatan 99,3 foizni, to‘liq bosqichlarda emlanish ko‘rsatkichi esa 82,3 foizni tashkil qilmoqda.

Shuningdek, buster doza bilan emlanganlar – 16,9 mln nafarni (rejaga nisbatan – 78,9 foiz) tashkil etmoqda.

• AOKA
• Nurmat Atabekov
• Omikron
• koronavirus
• salomatlik