Bugun, 14-yanvar kuni Oʻzbekistonda Vatan himoyachilari kuni va Oʻzbekiston Qurolli Kuchlari tashkil etilganining 30 yilligi nishonlanadi. Shuningdek, 14-yanvar mashhur davlat arbobi va sarkarda Mark Antoniy dunyoga kelgan, Daniya qirolichasi Margrete II taxtga chiqqan, “Gyugens” zondi Saturnning yoʻldoshi – Titanga qoʻngan kun hamdir.
Vatan himoyachilari kuni
14 yanvar – Oʻzbekiston Respublikasining suvereniteti, hududiy yaxlitligi, aholining tinchligi va xavfsizligini himoya qiluvchi kasb egalari – Vatan himoyachilari kunidir. 1992-yilning 14-yanvar sanasida Oʻzbekiston Respublikasi Qurolli Kuchlari tashkil topgan. 1993-yilning 29-dekabr kuni Oʻzbekiston Respublikasi Oliy Kengashining qarori bilan “14-yanvar – Vatan himoyachilari kuni” deb belgilangan.
Bu yili Oʻzbekiston Respublikasi Qurolli Kuchlari tashkil etilganiga 30 yil toʻldi.
Mark Antoniy dunyo kelgan kun
Qadimgi Rim konsuli, davlat arbobi va siyosatchi Mark Antoniy miloddan avvalgi 84-yilning 14-yanvar kuni dunyoga kelgan. U tarixda uddaburon sarkarda va kuchli siyosatchi sifatida nom qoldirgan.
Antoniy 54-yilda Gay Yuliy Sezar bilan birga Galliya urushida ishtirok etadi. Mark Antoniy respublikachilar tor-mor keltirilgandan keyin sharqiy viloyatlarga hokim etib tayinlangan. Shu yerda Misr malikasi Kleoparta bilan tanishgan va unga uylangan. Mark Antoniy Rim imperatorlari Klavdiy, Kaligula va Neronning ajdodi hisoblanadi.
Daniya qirolichasi Margrete II taxtga chiqqan kun
Daniya qirolichasi Margrete II 1972-yilning 14-yanvar kuni 31 yoshida taxtga chiqqan. U otasi qirol Frederik IXning oʻlimidan keyin toj kiygan va Daniya tarixidagi birinchi ayol hukmdorga aylangan. Qirolicha Daniya Qurolli kuchlarining oliy bosh qoʻmondoni hisoblanadi.
Qirolicha bolalik yillaridan rassomchilik bilan shugʻullanadi, tasviriy sanʼatning turli yoʻnalishlarida ijod qiladi. Margrete tomonidan chizilgan koʻplab suratlar nafaqat Daniya, balki xorijiy mamlakatlardagi koʻrgazmalarda ham namoyish etilgan.
“Gyugens” zondi Saturnning yoʻldoshi – Titanga qoʻngan kun
2005-yilning 14-yanvar kuni “Gyugens” zondi Titan yuzasiga qoʻngan. “Gyugens” zondi Yevropa kosmik agentligi tomonidan yasalgan va gollandiyalik astronom Kristian Gyugens sharafiga nomlangan. Zond 2004-yilning 25-dekabr kuni oʻz tashuvchisidan ajralgan va Titan tomon mustaqil harakatlanishni boshlagan. 2005-yilning 14-yanvar kuni Titan atmosferasiga kirib, uning Ksanada deb nomlangan hududiga kelib qoʻnadi. “Gyugens” zondi Titanni tadqiq qilish bilan shugʻullanayotgan olimlarga qimmatbaho maʼlumotlarni yetkazib bergan.
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!