OpenAI kompaniyasi ChatGPT platformasida ish topishga ko‘maklashuvchi yangi funksiyani sinovdan o‘tkazmoqda. ChatGPT Jobs deb nomlangan mazkur yechim virtual karyera yordamchisi sifatida ish qidirish jarayonlarini soddalashtirishi, rezyumening sifatini oshirishi va keyingi kasbiy qadamlarni rejalashtirishda yordam berishi kutilmoqda.

Ma’lum bo‘lishicha, yangi funksiya ChatGPT’ni kundalik vazifalarni hal qilishda universal ilovaga aylantirishga qaratilgan navbatdagi qadam hisoblanadi. U mantiqan yaqinda ishga tushirilgan “Health” bo‘limiga o‘xshash bo‘lib, asosiy e’tiborni karyera va kasbiy rivojlanish masalalariga qaratadi.

Ushbu bo‘lim orqali foydalanuvchilar ChatGPT’dan shaxsiy karyera maslahatchisi sifatida foydalanishi mumkin bo‘ladi. Xususan, rezyume va kasbiy profilni takomillashtirish, mehnat bozorida raqobatbardoshlikni oshirish hamda uzoq va qisqa muddatli karyera rejalarini tuzish imkoniyatlari taklif etiladi.

Funksiya tavsifida uchta asosiy yo‘nalish qayd etilgan. Birinchisi — rezyume va kasbiy profilni yaxshilash. Ikkinchisi — foydalanuvchiga mos ish o‘rinlarini topish va boshqa nomzodlar orasida ajralib turish usullarini aniqlash. Uchinchi yo‘nalish esa shaxsiy maqsad va kutilmalarni inobatga olgan holda karyera imkoniyatlarini izlash va taqqoslashdan iborat.

Ayni paytda ChatGPT Jobs ichki sinov bosqichida turibdi. Uning ommaviy foydalanishga qachon chiqarilishi haqida rasmiy ma’lumot e’lon qilinmagan.

• ChatGPT
• Yangilik