Finlandiya jahondagi eng baxtli mamlakatlar reytingida sakkizinchi bor birinchi o‘rinni egalladi. Uzoq davom etuvchi qish, yuqori soliqlar va sokin turmush tarziga qaramasdan, mamlakat Daniya, Islandiya va Shvetsiyani ortda qoldirdi. Tadqiqotchilar bu natijani kuchli ijtimoiy qo‘llab-quvvatlash, barqaror davlat siyosati va baxt tushunchasiga o‘ziga xos yondashuv bilan izohlamoqda.

Tadqiqotda insonlarning hayotdan qoniqish darajasi, ishonch, xavfsizlik va kelajakka ishonch kabi omillar baholangan. Mutaxassislar fikricha, Finlandiyada ushbu omillar o‘zaro muvozanatda shakllangan.

Shu bois mamlakat aholisi baxtni hissiy ko‘tarinkilik emas, balki barqaror hayot sifatida qabul qiladi.

Fin jamiyatida ijtimoiy aloqalar asosiy rol o‘ynaydi. Oksford universiteti tadqiqotida qatnashchilarga “qiyin paytda suyana oladigan insoningiz bormi?” degan savol berilgan. Finlandiyada aksariyat aholi bu savolga ijobiy javob bergan.

Ikkinchi muhim omil — davlat ijtimoiy himoya tizimi. Bepul tibbiyot, oliy ta’lim olish uchun keng imkoniyat, uzoq muddatli haq to‘lanadigan dekret ta’tili, uy-joy subsidiyalari va ishsizlik nafaqalari aholining moliyaviy bosimini kamaytiradi. Bu esa fuqarolarga kasb va hayot yo‘lini xavfsiz tanlash imkonini beradi.

Natijada stress darajasi pastlab, umumiy qoniqish yuqori bo‘ladi.

 Finlandiyada gender tengligi ham yuqori darajada. Ta’lim, tibbiyot va mehnat bozorida teng imkoniyatlar ayollar ishtiroki va iqtisodiy faollikni oshirgan. Bu umumiy ijtimoiy barqarorlikka xizmat qilmoqda.

Tadqiqotlar ko‘ra, baxt — bu hissiyot emas, balki inson asosiy ehtiyojlari uchun kurashmasdan yashay oladigan tizimdir. Finlandiya aynan shu model orqali dunyoda eng yuqori hayot sifatiga ega mamlakat sifatida namoyon bo‘lmoqda.

• Baxt
• Finlandiya
• reyting