Dunyoning eng boy 20 nafar milliarderining jami sarmoyasi taxminan 3,8 trillion dollarni tashkil etdi. Bu ko‘rsatkich dunyodagi aksariyat davlatlarning yillik yalpi ichki mahsulotidan (YAIM) yuqoridir. Bu haqda Forbes nashri ma’lum qildi.

Boyligi 714,2 milliard dollar deb baholanayotgan Ilon Mask tarixda sarmoyasi 700 mlrd dollardan oshgan birinchi insonga aylandi. 2020-yildan beri Maskning davlati deyarli 30 baravar ko‘paygan. 

Uning asosiy daromad manbalaridan biri — SpaceX kompaniyasidagi ulushi bo‘lib, hozirda u 366 milliard dollarga teng. Ayni paytda kompaniyaning bozor qiymati 800 milliard dollarni tashkil etmoqda va 2026-yil yakuniga qadar bu ko‘rsatkich 1,5 trillion dollarga yetishi prognoz qilinmoqda.

Google asoschilaridan biri Larri Peyj 257,7 milliard dollar sarmoya bilan reytingda ikkinchi pog‘onani band etgan. Ma’lum qilinisha, 2025-yil davomida Alphabet aksiyalarining 63 foizga o‘sishi Peyj davlatining sezilarli darajada oshishiga asosiy omil bo‘lgan.

Nvidia bosh direktori Jensen Xuangning boyligi 162,5 milliard dollarga yetib, u dunyoning eng badavlat shaxslari reytingida sakkizinchi o‘ringa ko‘tarildi. So‘nggi yetti yil ichida Nvidia aksiyalari 4200 foizdan ko‘proqqa oshgan. Natijada, Xuangning sarmoyasi dunyoning eng yirik 20 nafar milliarderi orasida eng tez o‘sish sur’atini namoyish etdi. 

Taqqoslash uchun, Bill Geytsning boyligi 2020-yildan buyon deyarli o‘zgarmagan. O‘sha yili Geyts dunyoning ikkinchi eng boy odami edi, ammo hozir u 18-o‘ringa tushib ketdi. Bunga asosan uning o‘nlab milliard dollar mablag‘ni xayriya maqsadlariga yo‘naltirgani sabab bo‘lgan. 

Forbes jurnali tadqiqotiga ko‘ra, 2025-yilda deyarli har oltinchi milliarder (464 nafar) o‘z boyligini moliya va investitsiyalar sohasida ishlab topgan.

• Forbes
• milliarderlar
• reyting