2018-yilning 3-dekabr kuni BMT Bosh assambleyasi har yilning 24-yanvar sanasini Xalqaro taʼlim kuni sifatida nishonlashni taklif qildi.
Taʼlim olish – Inson huquqlari umumjahon deklaratsiyasining 26-moddasida qayd etilgan har bir odamga tegishli huquqdir. Deklaratsiyaga koʻra, boshlangʻich va oʻrta taʼlim olish bepul boʻlishi shart. Boshlangʻich taʼlim esa bolalar uchun majburiy hisoblanadi.
Shunga qaramasdan, zamonaviy taʼlim tizimi global inqirozni boshdan kechirmoqda: 2015-yilda dunyodagi barcha bolalar va oʻsmirlarning 55 foizi oʻqishni ham, sanashni ham bilmasligi qayd etilgan.
Taʼlim tizimi va unga oid qiziqarli maʼlumotlar bilan tanishishni istaysizmi?
Bilimga chanqoq oʻquvchilar
Xitoyda yozgi taʼtil bor-yoʻgʻi 1 oy davom etadi, oʻquv dasturi esa boshlangʻich sinflardanoq murakkab mavzularni qamrab oladi. Oʻquvchilar har kuni tonggi soat 5 da uygʻonishadi, soat 8:00 gacha mustaqil oʻqib-oʻrganishadi, 16:00 gacha maktabdagi darslarga qatnashishadi. Qoʻshimcha darslar esa 21:00 gacha davom etadi. Bunday kun tartibiga boshqa mamlakatlarda yashovchi bolalar tugul, kattalar ham bardosh bera olmasalar kerak.
“Bemalolxoʻja” talabalar
Gretsiyalik talabalarga shunchalar koʻp imtiyozlar taqdim etilganki, ular oliy taʼlimni 30 yilgacha choʻzib yuborishadi. Gretsiyada talabalarning taʼlim olishi, tibbiy xizmatlar, oziq-ovqatlari bepul, transport uchun ham katta chegirmalar beriladi.
Eng uzoq davom etgan maʼruza
Dunyodagi eng uzoq davom etgan maʼruza avstraliyalik professor Barrouz tomonidan oʻqilgan boʻlib, u 50 soatga choʻzilgan va biologiya mavzusida boʻlgan.
Dunyodagi eng qadimiy universitet
Dunyodagi eng qadimiy va hozirgi kunga qadar ishlab kelayotgan universitet Marokashda joylashgan. Bu Karauin universiteti boʻlib, unga 859-yilda asos solingan.
Taʼlim olish koʻrsatkichlari eng past mamlakatlar
Dunyoda aholisining teng yarmi savodsiz boʻlgan 22 ta mamlakat bor, ularning 15 tasi Afrikada joylashgan. Savodxonlik darajasining eng past koʻrsatkichlari Somaliga tegishli, bu yerlik odamlarning 70 foizi oʻqish va yozishni bilmaydi.
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!