“Tarixdagi eng ilg‘or aqlli ko‘zoynak” deb atalayotgan ixtiro Meta korporatsiyasi rahbari Mark Sukerberg tomonidan taqdim etildi.

Ko‘zoynakning og‘irligi 98 gramm bo‘lib, linzalarida Vision Pro’dagi barcha imkoniyatlar mavjud: 

- 3D avatarli qo‘ng‘iroqlar;

- o‘yinlar;

- filmlar va brauzer.

Qurilmaning asosiy xususiyatlaridan biri uning displeyidir. Ular gardishga o‘rnatilgan mikro LED-proyektorlar bo‘lib, optik to‘lqin o‘tkazgichlar yordamida foydalanuvchining ko‘zi oldida tasvirni ko‘rsatadi.

Orion linzalari plastmassa yoki shishaga qaraganda uzoqroq chidaydigan va yengilroq bo‘lgan kremniy karbididan tayyorlangan. Bundan tashqari, bu material ancha yuqori nur sindirish ko‘rsatkichiga ega, bu esa proyektorlardan kelayotgan nurning foydalanuvchi ko‘zi oldidagi ko‘proq maydonni qamrab olishiga imkon beradi. Ko‘zoynakdagi ko‘rish maydoni 70 darajagacha yetadi, bu esa boshqa qurilmalarga nisbatan kattaroqdir.

Yangi modelning gardishi magniydan tayyorlangan: u alyuminiyga qaraganda yengilroq va issiqlikni bir tekis taqsimlashga yordam beradi. 

Qurilmani boshqarish uchun to‘plamga “neyron” bilaguzuk va kichik protsessorli blok ham kiradi. Ko‘zoynak smartfon yoki kompyutersiz ishlaydi, ammo blokdan uzoqlashganda faoliyatini to‘xtatadi. Qurilmani ko‘zlar, qo‘llar va barmoqlar yordamida, shuningdek, ovoz bilan ham boshqarish mumkin.

Orion kompaniyaning (Meta) sun’iy intellekti asosida ishlaydi. U nutqning o‘nlab tillardan sinxron tarjimasini amalga oshirishni va vaziyat bo‘yicha maslahat berishni biladi.

Hozircha Orion faqatgina prototip, biroq vaqt o‘tishi bilan kompaniya bu ko‘zoynakni ommaviy ishlab chiqarmoqchi. Avvalo, ular tasvir sifatini yaxshilash, dasturiy ta’minotni optimallashtirish va qurilmaning yakuniy narxini pasaytirish ustida ishlab chiqishlari zarur.

• Kashfiyot
• Lifestyle
• Meta
• Sukerberg
• ixtiro