Futbol bo‘yicha 2026-yilgi jahon chempionati boshlanishi arafasida Meksikada minglab o‘qituvchilar norozilik namoyishlarini boshladi. Yuzaga kelgan vaziyat munosabati bilan mamlakat prezidenti Klaudiya Sheynbaum maxsus bayonot bilan chiqdi.Ma’lum qilinishicha, Mexiko shahri markazidagi Sokalo maydonida o‘tkazilishi rejalashtirilgan FIFA muxlislari festivali norozilik aksiyalari sabab boshqa hududga ko‘chirilishi mumkin.

Tadbir jahon chempionatining ochilish marosimi va ilk uchrashuvi munosabati bilan tashkil etilgan bo‘lib, unda prezidentning ham ishtirok etishi kutilgan edi.Biroq Klaudiya Sheynbaum Meksika va Janubiy Afrika terma jamoalari o‘rtasidagi ochilish uchrashuviga bormasligini ma’lum qildi. Uning aytishicha, vaziyatni yaqindan kuzatish va norozilik namoyishlari bilan bog‘liq holatni nazorat qilish ustuvor vazifa hisoblanadi.Namoyishlarda ishtirok etayotgan o‘qituvchilar davlat pensiya tizimini qayta ko‘rib chiqish, ta’lim sohasi xodimlari uchun amaldagi qonunchilikni o‘zgartirish hamda ish haqlarini oshirishni talab qilmoqda. Ular hukumat talablarni bajarmaguncha aksiyalarni davom ettirishini bildirgan.

Hukumat ma’lumotlariga ko‘ra, namoyishchilar Sokalo maydonida lager tashkil qilishi va festival o‘tkazilishi rejalashtirilgan hududni egallab olishi mumkin. Shuningdek, bir guruh faollar Asteka stadioni yaqinidagi asosiy avtomobil yo‘llaridan birini ham to‘sib qo‘ygan.Rasmiylar jahon chempionati ochilish haftasi davomida ham norozilik aksiyalari davom etishini tasdiqlagan. Agar tadbir Sokalo maydonida o‘tkazilmasa, Mexiko shahri bo‘ylab oldindan tayyorlangan 18 ta muqobil maydondan foydalanish rejalashtirilgan.

Ma’lumot uchun, futbol bo‘yicha JCH–2026 bugun — 11-iyun kuni rasman start oladi. Turnirning ilk uchrashuvida mezbonlardan biri bo‘lgan Meksika terma jamoasi Janubiy Afrika bilan maydonga tushishi rejalashtirilgan.