Olimlar inson umrining biologik chegarasini aniqladi

Skolkovo Ilm-fan va texnologiyalar instituti olimlari inson umrining biologik chegarasi mavjud degan xulosaga keldi. Ularning fikricha, tibbiyot qarish jarayonini to‘liq to‘xtatishga erishgan taqdirda ham, inson abadiy yashay olmaydi.

Tadqiqotga ko‘ra, bunga hujayralarda umr davomida to‘planib boradigan tasodifiy DNK mutatsiyalari sabab bo‘ladi. Organizm ularning aksariyatini bartaraf etsa-da, vaqt o‘tishi bilan ayrimlari saqlanib qoladi. Natijada to‘qima va a’zolar faoliyati izdan chiqib, bu o‘limga olib kelishi mumkin.

Olimlar hisob-kitobiga ko‘ra, agar qarilik bilan bog‘liq barcha kasalliklar bartaraf etilsa ham, insonning o‘rtacha umr ko‘rish davomiyligi 150–190 yil atrofida bo‘lishi mumkin.

Shuningdek, tadqiqotda nazariy jihatdan inson umrining maksimal chegarasi 627 yil ekani qayd etilgan. Biroq olimlar bu amaliy natija emas, balki matematik model asosidagi nazariy hisob-kitob ekanini ta’kidlagan.