Namangan viloyatida umumiy qiymati 577,4 million so‘m bo‘lgan, sifatini tasdiqlovchi hujjatlarga ega bo‘lmagan 13 mingdan ortiq quti dori vositalarining noqonuniy muomalaga kiritilishining oldi olindi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar berdi.

Ma’lum qilinishicha, tezkor tadbir davomida fuqaro A.T. va boshqalar “Boburshoh” mahalla fuqarolar yig‘ini hududidagi xonadonda 56 turdagi 13 184 quti dori vositasini sotish maqsadida saqlab kelgani aniqlangan.

Dori vositalarining umumiy qiymati 577,4 million so‘mni tashkil etgan. Ular ashyoviy dalil sifatida olib qo‘yilgan.

Holat yuzasidan Jinoyat kodeksining 186-3-moddasi bilan jinoyat ishi qo‘zg‘atilgan. Hozirda tergov harakatlari olib borilmoqda.

Eslatib o‘tamiz, avvalroq Toshkent shahrida ham bir xonadonda Rossiyadan noqonuniy olib kelingan, qiymati qariyb 600 million so‘mlik kontrafakt dori vositalari saqlanayotgani aniqlangan edi.