Qozog‘istonda ilk bor bortida yo‘lovchi bo‘lgan uchuvchisiz havo taksisi sinov parvozini amalga oshirdi. Bu haqda Qozog‘iston Transport vazirligi xabar berdi.

Parvoz Ostona shahrida “Kelajak o‘yinlari — 2026” xalqaro turniri doirasida, maxsus ajratilgan hudud ustida amalga oshirilgan. EH216-S rusumli vertikal uchib-qo‘nuvchi elektr apparati (eVTOL) mamlakat tarixida ilk bor real sharoitlarda yo‘lovchi bilan uchuvchisiz parvozni namoyish etdi.

EH216-S ikki kishini tashishga mo‘ljallangan bo‘lib, soatiga 130 kilometrgacha tezlikka erisha oladi. Uchuvchisiz rejimda apparat 35 kilometrgacha masofani bosib o‘tishi mumkin.

Dastlab Qozog‘iston hukumati mamlakatning tabiiy, madaniy va tarixiy diqqatga sazovor joylari ustidan 5 daqiqadan 30 daqiqagacha davom etadigan namoyish va sayyohlik parvozlarini yo‘lga qo‘yish imkoniyatini ko‘rib chiqmoqda.

Kelajakda bunday uchuvchisiz havo taksilari shahar transport tizimining bir qismiga aylanishi va mavjud transport turlarini to‘ldirishi mumkin.

Shuningdek, apparatlardan shoshilinch tibbiy yordam ko‘rsatish, dori-darmon yetkazib berish, qidiruv-qutqaruv ishlari, yong‘inlarni o‘chirish va logistika kabi yo‘nalishlarda foydalanish rejalashtirilmoqda.

Loyiha doirasida Qozog‘istonda yo‘lovchi tashuvchi uchuvchisiz apparatlarni ishlab chiqarishni mahalliylashtirish ham ko‘zda tutilgan. Bu yangi yuqori texnologiyali ishlab chiqarish quvvatlari va ish o‘rinlarini yaratish, shuningdek, sanoat kooperatsiyasini kengaytirishga xizmat qilishi kutilmoqda.