O‘zbekiston milliy terma jamoasi va “Surxon” klubi himoyachisi Behruz Karimov faoliyatini Shveysariyaning “Lugano” klubida davom ettiradi. Bu haqda O‘zPFL xabar berdi.

18 yoshli futbolchi Toshkentda yangi klubi uchun tibbiy ko‘rikdan o‘tgan va shundan so‘ng “Lugano” bilan shartnoma imzolagan.

Endilikda Karimov Shveysariyada faoliyat yuritishi uchun viza rasmiylashtirilishini kutmoqda. Tegishli hujjatlar tayyor bo‘lgach, u Luganoga yo‘l oladi.

Shveysariyaning Contropiede nashri ham “Lugano” 18 yoshli o‘ng qanot himoyachisini “Surxon” safidan o‘z tarkibiga qo‘shib olganini xabar qilgan. Klub transferni hali rasman e’lon qilmagan bo‘lsa-da, futbolchi shartnomani imzolab bo‘lgan. Rasmiy bayonot yaqin kunlarda e’lon qilinishi kutilmoqda.

Karimov “Odil Junior” akademiyasi tarbiyalanuvchisi hisoblanadi. U 2026 yilgi Jahon chempionatida O‘zbekiston milliy terma jamoasi safida Portugaliya va Kolumbiyaga qarshi uchrashuvlarda maydonga tushgan.

Futbolchining “Lugano”ga transferi jamoaning o‘ng qanot himoyachisi Mattia Zanottining kelajagi borasidagi noaniqliklar fonida amalga oshmoqda. Italiyalik futbolchining boshqa klubga o‘tishi kutilmoqda.

Ayni paytda “Lugano” Shveysariya Superligasida ikki turdan keyin 6 ochko jamg‘arib, turnir jadvalida ikkinchi o‘rinda bormoqda. “Young Boys” esa to‘plar nisbatiga ko‘ra peshqadamlik qilmoqda.