O‘zbekistonlik professional bokschi Qudratillo Abduqahhorov AQShda immigratsiya qoidalarini buzish bilan bog‘liq holat sabab hibsga olinib, keyinchalik mamlakatdan deportatsiya qilingan. Bu haqda “Fighting Styles” nashri xabar berdi.

Abduqahhorov 2026 yil 21 mart kuni Janubiy Kaliforniyada o‘tkazilgan ProBox boks oqshomida Joshua Kevin Antonga qarshi ringga chiqqan. O‘zbekistonlik bokschi jangning birinchi raundida texnik nokaut bilan mag‘lub bo‘lgan. Raund yakunlangach, u o‘zini yomon his qilgani va boshida kuchli og‘riq sezganini bildirgan. Shundan so‘ng jangni davom ettirmaslikka qaror qilingan.

Jangdan keyin bokschi Los-Anjelesdan doimiy yashab, ishlab kelgan Pensilvaniyaga yo‘l olgan. Uning so‘zlariga ko‘ra, avtomobilda birga ketayotgan tanishi bilan tegishli hujjatlar va amaldagi vizalar bo‘lmagan.

Oradan 5–6 kun o‘tib, ularni politsiya to‘xtatgan va Abduqahhorov hibsga olingan. Keyinchalik bokschi AQSH Immigratsiya va bojxona nazorati xizmati (ICE) ixtiyoriga topshirilib, Vayoming shtatidagi Sweetwater County Jail hibsxonasiga yuborilgan.

Abduqahhorovning aytishicha, u ushbu hibsxonada 45 kun saqlangan. Uning uchun 25 ming dollar miqdorida garov puli to‘langan bo‘lsa-da, bokschi taxminan bir oy davomida advokat xizmatidan foydalana olgan, keyinchalik esa advokati bilan aloqasi uzilgan. Hibsda bo‘lgan vaqtida internetdan foydalanish imkoniga ham ega bo‘lmagan.

Bokschi hibsda unga nisbatan zo‘ravonlik yoki boshqa turdagi tazyiq o‘tkazilganini ma’lum qilmagan. Biroq u professional boksda bir qator nufuzli kamarlarni qo‘lga kiritgan sportchi sifatida bunday vaziyatga tushib qolishini kutmaganini bildirgan.

Shuningdek, Abduqahhorov va uning menejeri Kike Maganya o‘rtasida moliyaviy mojaro yuzaga kelgani ma’lum bo‘ldi. Bokschi menejerini 21 martdagi jang uchun belgilangan gonorarni bermaganlikda ayblagan. Maganya esa bu da’volarni rad etib, Zelle orqali amalga oshirilgan to‘lovlarni tasdiqlovchi skrinshotlarni taqdim etganini aytgan.

Menejerning ta’kidlashicha, gonorardan soliqlar va boshqa majburiy to‘lovlar ushlab qolinganidan so‘ng, mablag‘ bokschining hisob raqamiga o‘tkazilgan. Abduqahhorov esa ushbu pulni olmaganini bildirmoqda.

Maganyaning so‘zlariga ko‘ra, bokschining AQSHda ishlash vizasi bo‘lgan, biroq uning amal qilish muddati tugagan. Menejer Abduqahhorovga O‘zbekistonga qaytib, hujjatlarini tartibga keltirishni tavsiya qilgan. Biroq bokschi AQSHda qolib, DoorDash haydovchisi sifatida ishlashda davom etgan. Keyinchalik u hibsga olinib, mamlakatdan deportatsiya qilingan.

Ayni paytda Abduqahhorov va menejeri o‘rtasidagi moliyaviy nizo hal etilmagan. Nashr ma’lumotlariga ko‘ra, ushbu masala yuzasidan hozircha sud jarayoni ham boshlanmagan.

Hozirda Abduqahhorov O‘zbekistonda, oilasi bilan Andijonda yashamoqda. U mashg‘ulotlarni davom ettirib, navbatdagi jangi uchun raqib izlamoqda.

Majburiy deportatsiya sabab bokschi hozircha AQSHga qayta olmaydi. Uning mamlakatga qonuniy ravishda qaytishi uchun kamida bir yil kutishiga to‘g‘ri kelishi mumkin. Biroq taqiq muddati bundan uzoqroq bo‘lishi ham ehtimoldan xoli emas.