AQSh Senati Rossiya va Eronga qarshi keng qamrovli sanksiyalarni nazarda tutuvchi “Lindsey O. Graham Sanctioning Russia and Iran Act of 2026” qonun loyihasini 86 ovoz bilan 11 ta ovozga qarshi qabul qildi. Bu haqda Reuters xabar berdi.

Qonun loyihasi Rossiya rasmiylariga qarshi sanksiyalar joriy etish hamda Rossiya nefti va gaziga qaramlikni kamaytirish maqsadida Xitoy, Hindiston va boshqa davlatlarga nisbatan yuqori boj tariflarini qo‘llash vakolatini AQSH prezidentiga berishni nazarda tutadi.

Hujjatda, shuningdek, AQSH prezidenti Donald Tramp talab qilgan Eronga qarshi sanksiyalarni kengaytirish ham ko‘zda tutilgan.

Agar qonun loyihasi AQSH Vakillar palatasida ham ma’qullanib, prezident tomonidan imzolansa, Rossiya energetika resurslarini yirik miqyosda sotib oladigan davlatlarga, jumladan, Hindiston, Yaponiya va Yevropa Ittifoqining ayrim davlatlariga nisbatan import tariflarini 100 foizgacha oshirish imkoniyati paydo bo‘ladi.

Biroq ayrim kongressmenlar va sanoat vakillari yangi tarif vakolatlari AQSH importchilari va iste’molchilari uchun xarajatlarni oshirishi mumkinligidan xavotir bildirmoqda.

Qonun loyihasi endi Vakillar palatasida ko‘rib chiqiladi. Palata 31 avgust kuni yozgi tanaffusdan qaytishi kutilmoqda.

Eslatib o‘tamiz, respublikachi senator Lindsey Graham Rossiyaga qarshi yangi sanksiyalar to‘g‘risidagi qonun loyihasi ustida ishlagan va Rossiyaning Ukrainaga qarshi urushida Kiyevning Kongressdagi faol tarafdorlaridan biri bo‘lgan. U o‘tgan oy boshida Kiyevga tashrif buyurib, Ukraina prezidenti Volodimir Zelenskiy bilan uchrashgan edi.