Avstriya kansleri Kristian Shtoker farzandlarga g‘amxo‘rlik qilishni ish sifatida baholamaslik haqidagi bayonoti uchun onalardan uzr so‘radi. Bu haqda “Kronen Zeitung” xabar berdi.

Voqea Shtokerning mamlakat bo‘ylab safari doirasida Zalsburg shahrida o‘tkazilgan uchrashuvda yuz bergan. Tadbirda ayollardan biri yolg‘iz onalarni moliyaviy qo‘llab-quvvatlash masalasi yuzasidan kanslerga savol bergan. Uning ta’kidlashicha, yolg‘iz onalar farzandlariga qarash uchun haftasiga o‘rtacha 96 soat haq to‘lanmaydigan mehnat qiladi.

Bunga javoban Shtoker bolalarga qarashni “ish sifatida ko‘rib chiqmagan bo‘lardim”, degan. Shuningdek, u oilaviy hayotni evaziga hech qanday haq olinmaydigan faoliyat sifatida ta’riflagan.

Kanslerning bu so‘zlari ijtimoiy tarmoqlar va siyosiy doiralarda keskin tanqidlarga sabab bo‘ldi. “Yashillar” partiyasi vakili Leonore Gevessler onalarning mehnati qadrlanishi va ular masxaraga emas, uzrga loyiq ekanini ta’kidladi. Avstriya Ozodlik partiyasi rahbari Gerbert Kikl esa bayonotni “onalar ustidan masxara” deb baholadi.

Oradan bir hafta o‘tib, Shtoker o‘z so‘zlari noto‘g‘ri bo‘lganini tan oldi va onalardan “shartsiz” uzr so‘radi.

“Farzandlarga g‘amxo‘rlik qilish — bu mehnat. Aksariyat oilalarda bolalarga qarash mas’uliyatining asosiy qismini o‘z zimmasiga olayotgan ayollar juda muhim ishni amalga oshirmoqda”, — dedi Avstriya kansleri.

Ushbu voqea oiladagi bepul mehnat va bolalar parvarishining jamiyatdagi o‘rni masalasida siyosiy bahslarni kuchaytirdi.