Joriy yil 22-may kuni Namanganda 61-Xalqaro gullar festivali boshlandi.

15 kun davom etadigan anʼanaviy bayramda Xitoy, Yaponiya, Koreya, Turkiya, Rossiya, Hindiston kabi xorijiy mamlakatlardan kelgan mehmonlar va jurnalistlar ishtirok etmoqda.

Mazkur tipdagi xalqaro tadbirlar o‘z-o‘zidan byudjetdan katta mablag‘larni talab qiladi.

Jumladan, Hukumatning 2022-yil 2-fevraldagi qaroriga muvofiq “Xalqaro gullar bayrami festivali”ni moliyalashtirish mahalliy byudjet mablag‘laridan qoplanadi.

Mazkur tadbir uchun viloyat hokimligi 1 mlrd 78 mln so‘m, Namangan shahar hokimligi esa 200 mln so‘m ajratgan.

Jumladan, Namanganda 22-may – 5-iyun kunlari xalqaro “Gullar festivali”ning 61 yilligini yuqori saviyada o‘tkazish maqsadida, viloyat musiqali drama teatri sahnasida Rus milliy drama teatrining spektakl tamoshalarini tashkil etish va O‘zbekiston Milliy simfonik orkestrining hamda Rus milliy drama teatrining ijodiy va texnik jamoasini kutib olish xarajatlari va boshqa xarajatlar uchun viloyatning viloyat byudjeti zaxira jamg‘armasi mablag‘lari hisobidan Namangan viloyat madaniyat boshqarmasiga 364,5 million so‘m mablag‘ ajratilgan.

Shuningdek, mazkur tadbirni yuqori saviyada o‘tkazish bilan bog‘liq xarajatlar uchun viloyatning viloyat byudjeti zaxira jamg‘armasi mablag‘lari hisobidan Namangan shahar mahalliy byudjetiga 714 mln 547 ming so‘m mablag‘ ajratilgan.

Bundan tashqari joriy yil 18-may sanasida imzolangan Namangan shahar hokimining tegishli qarori bilan shahar markaziy ko‘cha, xiyobonlar hamda “Z.M.Bobur” nomli madaniyat va istirohat bog‘i hududida keng ko‘lamda obodonlashtirish, ko‘kalamzorlashtirish, bayramona bezatish hamda zamonaviy shaharsozlik talablari asosida tashqi yoritish illyuminatsion tarmoqlarini tortish va o‘rnatish bilan bog‘liq xarajatlar uchun shahar mahalliy byudjetining 2022-yil zaxira jamg‘armasi hisobidan 200 million so‘m mablag‘lar shahar obodonlashtirish boshqarmasiga ajratilgan.

Garchi Hukumat qarori bilan ushbu tadbirning moliyaviy manbasi “mahalliy byudjet mablag‘lari” ekanligi ko‘rsatib o‘tilgan bo‘lsa-da, viloyat hokimi Sh. Abdurazzoqovning 11-apreldagi qaroriga ko‘ra, festivalga tayyorgarlik ko‘rishga Namangan viloyati mahalliy byudjetining qo‘shimcha manbalaridan tashqari, yuridik va jismoniy shaxslarning homiylik xayriyalari va qonun hujjatlarida taqiqlanmagan boshqa manbalar ham jalb qilinadi.

Bu esa o‘z navbatida tadbirlarga sarflanayotgan pullarning sarflanishi yuzasidan o‘tkaziladigan nazorat shaffofligiga putur yetkizadi.

Shuningdek, festival doirasida o‘tkaziladigan ko‘rik-tanlov g‘oliblari tegishli tartibda diplom, haykalcha va quyidagi sovg‘alar bilan taqdirlanadi:

Oliy o‘rin (2 nafar) – avtomobil;

1-o‘rin (2 nafar) – qimmatbaho sovg‘alar;

2-o‘rin (2 nafar) – qimmatbaho sovg‘alar;

3-o‘rin (2 nafar) –  qimmatbaho sovg‘alar:

“Qadimiy sulola davomchisi” – qimmatbaho sovg‘alar;

“Yangi gul navi yaratgan gulchi” – qimmatbaho sovg‘alar;

“Eng yosh gulchi” – qimmatbaho sovg‘alar;

“Eng yaxshi gul kompozitsiyasi” – qimmatbaho sovg‘alar;

“Eng yaxshi gulchi maktabi gulchisi” – qimmatbaho sovg‘alar;

“Eng ko‘p gul yetishtirgan gulchi” – qimmatbaho sovg‘alar;

“Gul paradida eng yaxshi bezatilgan avtomashina” – qimmatbaho 

sovg‘alar.

Shuningdek, taqdirlash marosimida moliyaviy holatdan kelib chiqib, g‘oliblar soni va sovg‘alar miqdoriga o‘zgartirishlar kiritilishi mumkinligi ham istisno qilinmagan.

Tashkilotchilar, ijodiy uyushmalar, jamg‘armalar va boshqa tashkilotlar hayʼat aʼzolari va muxlislar eʼtirofiga sazovor bo‘lgan gulchilarni taqdirlash uchun mustaqil ravishda maxsus mukofotlar taʼsis etishlari mumkin.

Shuningdek, tadbir doirasida ko‘rsatiladigan (sarflangan pullarni rasmiylashtirishning imkoni bo‘lmagan) xizmatlar quyidagicha:

– festival doirasida tadbir bo‘lib o‘tayotgan hududlardan o‘tuvchi avtomobil yo‘llari Viloyat ichki ishlar boshqarmasi yo‘l harakati xavfsizligi boshqarmasi tomonidan transport vositalari uchun yopilgan va bu haqda ogohdantiruvchi yo‘l belgilarini o‘rnatilgan.

– viloyat mudofaaga ko‘maklashuvchi “Vatanparvar” tashkiloti hamda viloyatdagi korxona, tashkilot va boshqarmalar festival doirasida Namangan shahrining asosiy ko‘chalarida maxsus gullar bilan bezatilgan 150 ta avtomashinalaridan iborat “Bayram paradi”ni tashkil etishlari kerak.

Eslatib o‘tamiz, avvalroq Surxondaryoda o‘tkazilgan “Boysun bahori” festivaliga sarflangan mablag‘lar yuzasidan material eʼlon qilingan edi.

• Davlat byudjeti
• Gullar festivali
• Namangan