Bosh prokuratura huzuridagi Departament tomonidan Xiva, Nurafshon, Ulug‘nor, Toshkent va Ohangaron tumanlari hamda Toshloq tumanida o‘tkazilgan tergovga qadar tekshiruvlarda elektr energiyasi va tabiiy gazdan noqonuniy foydalanish bilan bog‘liq oltita holat aniqlangan. Mazkur holatlarda davlatga yetkazilgan zarar jami 1 milliard 281,5 million so‘mni tashkil etgan.

Aniqlanishicha, Xiva shahrida “M.D.” oilaviy korxonasi mas’ullari umumiy foydalanishdagi elektr tarmog‘iga o‘zboshimchalik bilan to‘g‘ridan-to‘g‘ri ulanib, 542,3 million so‘mlik elektr energiyasidan noqonuniy foydalangan. Nurafshon shahrida fuqaro M.A. tomonidan xuddi shunday qoidabuzarlik sodir etilib, 186,2 million so‘mlik elektr energiyasi noqonuniy ishlatilgan. Ulug‘nor tumanida esa “Z.X.” nomli YTT avtomobil yuvish shoxobchasini umumiy elektr tarmog‘iga noqonuniy ulab, 116,3 million so‘mlik elektr energiyasidan foydalangan.

Bundan tashqari, Toshkent tumanida fuqaro K.O. xonadonida tabiiy gaz tarmog‘iga noqonuniy ulanib, 106 million so‘mlik gazdan foydalangan. Ohangaron tumanida fuqaro U.I. dala hovlisida gaz hisoblagichga tashqi ta’sir ko‘rsatish orqali 219,2 million so‘mlik, Toshloq tumanida fuqaro R.D. esa umumiy foydalanishdagi gaz tarmog‘iga noqonuniy ulanish orqali 111,5 million so‘mlik tabiiy gazdan foydalangani aniqlangan.

Mazkur holatlar yuzasidan Jinoyat kodeksining tegishli moddalari bilan jinoyat ishlari qo‘zg‘atilgan. Hozirda holatlar bo‘yicha tergov harakatlari olib borilmoqda.