Navoiy viloyatining Qiziltepa tumanida ov qurollari bilan qurollangan bir guruh brakonyerlar viloyat ekologiya boshqarmasi tezkor guruhi xodimi I.X.ga kuch ishlatdi. Bu haqda Rasul Kusherbayev xabar berdi.

Xabarga ko‘ra, noqonuniy ov bilan shug‘ullangan brakonyerlar ekologiya inspektorining qonuniy talablariga bo‘ysunmagani holda o‘zlariga yordam uchun Buxoro viloyatidan “ko‘cha mafiyasi”dan iborat guruh chaqirib, ular yordamida qochib ketishga erishgan.

Ushbu holatni Navoiy viloyati IIB matbuot xizmati tasdiqladi. Voqea o‘rganilgan va fuqarolarning shaxsi aniqlanib tuman IIBga olib kelingan. Surishtiruv jarayonida ma’lum bo‘lishicha, Qiziltepa tumani To‘dako‘l suv havzasi hududiga ov qilish uchun kelgan buxorolik 5 nafar fuqaro shu hududda o‘z xizmat vazifasini o‘tayotgan ekologiya boshqarmasi xodimi I.X.ning qonuniy talabiga bo‘ysunmay, unga nisbatan kuch ishlatgan.

O‘rganishlar natijasida avtomashina yukxonasi ko‘zdan kechirilganda bitta yovvoyi quyon, ikkita yovvoyi o‘rdak hamda saqlash uchun ruxsatnomasi bor 4 ta ov quroli mavjudligi aniqlangan.

Ayni paytda holat yuzasidan Qiziltepa tumani IIB tomonidan barcha tegishli ekspertizalar tayinlanib, tergovga qadar tekshiruv harakatlari olib borilmoqda.

• Davlat ekologiya qo'mitasi
• Navoiy