Bugun, 18-mart kuni O‘zbekiston Afg‘onistonga insonparvarlik yordami yubordi. Bu haqda mamlakat Tashqi ishlar vazirligi ma’lum qildi.

Qayd etilishicha, yordam Ramazon hayiti munosabati bilan Afg‘oniston aholisini qo‘llab-quvvatlash hamda ikki davlat o‘rtasidagi qo‘shnichilik aloqalarini mustahkamlash maqsadida amalga oshirilgan.

Umumiy og‘irligi 290 tonnadan ortiq bo‘lgan yuk tarkibiga un, guruch, bug‘doy, o‘simlik yog‘i, tez tayyorlanadigan oziq-ovqat mahsulotlari, makaron va qandolat mahsulotlari kiritilgan.

Insonparvarlik yordamini topshirish marosimi Hayraton shahrida bo‘lib o‘tgan. Unda Balx viloyati rasmiylari, jumladan gubernator o‘rinbosari Mavlaviy Abu Idris, shuningdek mahalliy hokimiyat va Tashqi ishlar vazirligi vakillari ishtirok etgan.

Tadbirda O‘zbekistonning Afg‘onistondagi elchisi Oybek Usmanov hamda Surxondaryo viloyati hokimi Ulug‘bek Qosimov ham qatnashgan.

Balx viloyati rasmiylari O‘zbekiston tomoniga ko‘rsatilgan yordam uchun minnatdorlik bildirgan.

• Afg‘oniston
• Gumanitar yordam
• Hayit
• Ramazon