Davlat xavfsizlik xizmatining Namangan viloyati bo‘yicha boshqarmasi, Iqtisodiy jinoyatlarga qarshi kurashish departamenti, Ichki ishlar organlari va “Farmatsevtika mahsulotlari xavfsizligi markazi” DM xodimlari hamkorligida o‘tkazilgan tezkor tadbirda Kosonsoy tumanida yashovchi, 1971, 1975 va 1990-yillarda tug‘ilgan 3 nafar fuqaro tomonidan tumanning “O‘rikzor”, “Gulobod” va “Mahdumi A’zam” mahalla fuqarolar yig‘inlari hududlarida tashkil etilgan 3 ta “yashirin ombor” fosh etildi.

Natijada 723 turdagi jami 57422 dona xorijiy davlatlarda ishlab chiqarilgan va sifat sertifikatiga ega bo‘lmagan, shuningdek, ayrimlarining yaroqlilik muddati o‘tgan kontrafakt dori vositalari protsessual tartibda rasmiylashtirib olingan.

DXX Qashqadaryo viloyati bo‘yicha boshqarmasi, Iqtisodiy jinoyatlarga qarshi kurashish departamenti va “Farmatsevtika mahsulotlari xavfsizligi markazi” DM hamkorligida o‘tkazilgan tadbirda esa Qarshi tumanida istiqomat qiluvchi, 1965-yilda tug‘ilgan shaxs o‘zining yashash xonadonida tegishli litsenziyasiz dorixona tashkil qilib, 82 turdagi jami 1520 dona me’yoriy hujjati bo‘lmagan dori vositalarini sotib kelayotganligi aniqlangan.

Yana bir holat Samarqand shahrida ham qayd etilib, jumladan, 1980-yilda tug‘ilgan mahalliy fuqaro ijaraga olgan omborxonalarda 225 turdagi jami 14322 dona iste’molga yaroqsiz dori vositalari sotish maqsadida saqlab kelinayotganligi Davlat xavfsizlik xizmati va Iqtisodiy jinoyatlarga qarshi kurashish departamenti xodimlari tomonidan fosh etilgan.Hozirda har uchala holatda olingan dori vositalariga nisbatan ekspertiza tayinlanib, tergovga qadar tekshiruv harakatlari olib borilmoqda.

• DXX
• Dori
• Namangan
• Qashqadaryo
• Samarqand