Vaqt yetishmasligi, oʻzini yomon sezish, samaradorlikning pastligi, murakkabliklar va turli omadsizliklar hayotingizni noxush qiluvchi yomon odatlarga sabab boʻlishi mumkin. Omadsizlikni tark etish uchun esa yomon odatlardan tezda xalos boʻlish kerak.
Yomon odatlar hayotga salbiy taʼsir qilayotganini dastlab sezmaslik ham mumkin. Faqat ruhan kuchlilargina salbiy jismoniy va hissiy odatlardan qutilish uchun oʻzida kuch topa oladi. Hayotni tubdan yaxshi tomonga oʻzgartirish vaqti yetdi.
1. Shoshilishni kamaytiring. Koʻp hollarda ishlarimizni orqaga suramiz, vaqti yetganda esa shoshilib qolamiz, kechikamiz. Vaqtdan oqilona foydalanish vaqti yetmadimikan? Loyiha va topshiriqlar oʻz vaqtida bajarilishi lozim. Rejalashtirishni oʻrganib oling.
2. Stressga yoʻl qoʻymang. Doimiy ravishda stress va zoʻriqishlarni his qilamiz. Stress – bu besaranjomlik, tashvish va baxtsizlik belgisi. Bunga ishxonadagi murakkabliklar, muhabbatdagi muvaffaqiyatsizliklar yoki sogʻliq bilan bogʻliq muammolar sabab boʻlishi mumkin. Sizni qiynayotgan muammoni tezda hal qiling. Stressdan yaxshilikka stimul sifatida foydalaning.
3. Nosogʻlom ovqatni kamaytiring. McDonaldʼs, KFC, Burger King va boshqa fast-fudlar – bu zamonaviy jamiyatning ofati. Sogʻlom ovqatlanishdan salomatlikka, goʻzal qomatga va yaxshi kayfiyatga yoʻl bor.
4. Dushmanlarni kamaytiring. Ochiq dushmaningiz boʻlmasligi mumkin, ammo yashirinlari yetarlicha boʻladi. Atrofingizda sizga xalaqit beruvchilar borligi aniq. Ular har qanaqa ishga kirishsangiz ham qoʻllab-quvvatlash oʻrniga tanqid qilishadi va ishonchingizni soʻndirishadi. Ular yordam berish oʻrniga orqaga tortishadi. Shunday odamlar bilan ishlang-ki, ularning oʻrinli tanqidi ishingiz rivojiga yordam bersin.
5. Befoyda ishlardan chekining, yalqovlanmang. Erinchoqlik qilamiz-da, oxiriga yetmay qolgan ish tufayli aziyat chekib yuramiz. Televizor, ijtimoiy tarmoqlar, internetdagi maqsadsiz selfilar va kompyuter oʻyinlari vaqtimizni zoye qiladi. Bu ishlarga juda cheklangan miqdorda vaqt ajrating. Qatʼiy amal qiling. Biroz qiynalasiz, lekin hamma ishni uddalashga ulgurasiz.
6. Tasodifiy munosabatlarga yoʻl qoʻymang. Qizlar bilan uchrashib yurasizmi? Baxtsizmisiz? Munosabatlardan oʻzini baxtsiz his qilish – bu sevgi emas, yolgʻizlikdan qoʻrqishdir. Munosib turmush oʻrtogʻi tanlang, u sizni baxtli qiladi. Aksincha boʻlsa, yurar yoʻlingizning oxiri boʻlmaydi.
7. Chekishni kamaytiring, iloji boʻlsa, chekmang! Chekish astalik va ishonch bilan sogʻligʻingizni, potensiyangizni yemiradi. Elektron sigaretlarning foydasi yoʻq. Narkotiklarning turgan-bitgani ajal ekanligini unutmang!
8. Alkogolni ichmaganingiz maʼqul. Alkogol nafaqat ertalabki kayfiyatga, umuman kayfiyatga juda yomon taʼsir qiladi. Yurak kasalliklari, miya bilan bogʻliq muammolar, jigar sirrozi, saraton... Ichkilik xuddi mana shu kasalliklar bilan ogʻrish xavfi ostida qoldiradi. Bu sizga kerakmi?
9. Nosogʻlom hayot tarzidan voz keching. Sport bilan shugʻullanib borganingiz sayin oʻzingizni goʻzallashib, sogʻlomlashib borayotganingizni, baxtiyorligingizni his qilasiz. Haftasiga 2 marta sport bilan shugʻullaning.
10. Yomon fikrlashdan qayting. Hayotimizning yaxshi tomonlari koʻp. Boriga shukur qilib yashashni oʻrganing, aslida yoʻq boʻlgan narsadan noliyvermang. Yaxshilikka intiling. Ana oʻshanda dunyoning goʻzalliklari yanada yorqinroq namoyon boʻla boshlaydi.
Sizda yomon odatlar bormi? Ularning hammasidan voz kechish vaqti kelmadimikan?
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!