“Oʻrgimchak odam: Uyga yoʻl yoʻq” filmidagi bosh rol ijrochisi Tom Xolland Jeyms Bond rolini ijro etishga tayyor ekanligini bildirdi. Aktyor bu haqida tok-shoularning birida aytib oʻtgan.

Ijodkorning taʼkidlashicha, Josus 007 obrazini har doim yaxshi koʻrgan. Xolland bunday rolni gavdalantirish uchun juda yosh ekanligini oʻzi ham bilishini aytib, filmning keyingi qismi ustida ishlayotgan ijodkorlarga oʻz gʻoyalarini taqdim etgan.

“Men Jeyms Bondning ashaddiy muxlisiman. Deniyel Kreyg ishtirokidagi filmlar juda yoqadi. Bilasizmi, oʻylab qoldim: Jeyms Bondning qanday qilib Bond boʻla olganini koʻrish haqiqatdan qiziqarli boʻladi. Men film uchun mana shu gʻoyani beraman”, dedi Tom Xolland.

Eslatib oʻtamiz, Jeyms Bond haqidagi “Oʻlish vaqti emas” filmi 2021-yili taqdim etilgan edi. Aktyor Deniyel Kreyg esa ushbu filmda soʻnggi bor Josus 007 rolini ijro etgani va loyihadan ketishi haqida maʼlum qilgan. Film prodyuseri Barbara Brokkoli Jeyms Bond rolini ijro etish uchun munosib nomzod qidirish boshlanganini aytgan.

• Kino
• San’at
• Shou-biznes
• mashhurlar