Oxirgi uch hafta ichida 1 millionga yaqin falastinlik G‘azo sektori janubidagi Rafah shahridan qochib ketdi. Bu haqda Birlashgan Millatlar Tashkilotining Falastinlik qochqinlarga yordam ko‘rsatish agentligi ijtimoiy tarmoqlarda e’lon qilingan xabarida ma’lum qilindi, deb yozadi “Anadolu”.

Hisobotga ko‘ra, oxirgi uch hafta ichida kamida 1 million falastinlik Rafahni tark etib, G‘azo sektorining turli qismlariga ko‘chishga majbur bo‘lgan.

Anklavda xavfsiz joy yo‘qligi sababli boradigan joyi qolmagan falastinliklar Isroilning tinimsiz hujumlaridan boshpana izlashga majbur bo‘ldi. Bundan tashqari, agentlik oziq-ovqat va suv tanqisligiga e’tibor qaratdi. Tashkilot bayonotida aytilishicha, G‘azo sektoridagi falastinliklarga yordam berish va ularni himoya qilish kundan kunga qiyinlashib bormoqda.

Avvalroq, 7-may kuni Isroil armiyasi Misr bilan chegaradagi Rafah nazorat punktida anklavning Falastin qismi ustidan nazorat o‘rnatganini ma’lum qilgandi.

26-may kuni Isroil Xalqaro jinoiy sud qaroriga zid ravishda G‘azo sektorining Rafah shahridagi falastinlik qochqinlar lageriga hujum qildi. Isroil hujumida kamida 45 nafar falastinlik, jumladan ayollar, bolalar va qariyalar halok bo‘ldi. Bundan tashqari, yana 249 falastinlik yaralangan.

• BMT
• Falastin