O‘zbekiston futbol assotsiatsiyasi birinchi vitse-prezidenti Ravshan Ermatov Portugaliyaga qarshi uchrashuvdagi yirik hisobli mag‘lubiyat yuzasidan fikr bildirdi.

Uning ta’kidlashicha, O‘zbekiston terma jamoasi hali rivojlanish bosqichida bo‘lib, jahon futbolining yetakchi jamoalari bilan tengma-teng raqobatlashish uchun vaqt va tajriba zarur.

“Hisob 0:2 bo‘lib turgan paytda golimiz inobatga olinganida, o‘yin boshqacha tus olishi mumkin edi. Ayrim vaziyatlarda adolatsizlik bo‘ldi, biroq buni ham qabul qilishimiz kerak. Har qanday holatda ham biz hozir rivojlanish yo‘lidamiz. Mamlakatimizda futbol taraqqiyoti uchun barcha sharoitlar yaratilmoqda, ammo natijaga erishish uchun vaqt kerak.

Birinchi sinf o‘quvchisi to‘qqizinchi sinf o‘quvchisi bilan teng raqobatlasha olmaganidek, biz ham hozircha jahon futbolining eng kuchli jamoalari bilan bir bosqichda emasmiz. Bu o‘zimizni oqlash emas, balki vaziyatga real baho berishdir. Shunday kunlar keladiki, hali Portugaliya O‘zbekistondan qo‘rqib maydonga tushadigan bo‘ladi. Agar rivojlanish yo‘limizdan og‘ishmasak, albatta shunday darajaga yetamiz.

Behruz Karimovning 18 yoshida shunday yirik musobaqada yuqori saviyada o‘yin ko‘rsatayotgani ham katta yutuq. Bu bugungi O‘zbekistonda yosh futbolchilar uchun yaratilgan imkoniyatlarning natijasidir. Jahon chempionatidagi ilk tajribamiz bizga qaysi jihatlar ustida ishlashimiz kerakligini ko‘rsatmoqda. Ushbu turnir jamoamiz uchun katta maktab bo‘lib xizmat qilmoqda va kelgusidagi muvaffaqiyatlar uchun muhim poydevor vazifasini o‘taydi”, – dedi Ravshan Ermatov.

• Assotsiatsiya
• Futbol
• Jahon chempionati
• O‘zbekiston
• Portugaliya
• Ravshan Ermatov
• Sport