Oʻzbekiston Respublikasi Bosh prokuraturasi tomonidan oʻtkazilayotgan tekshiruvlar yakunida bir qator sport federatsiyalarida moliyaviy qoidabuzarliklar aniqlanayotgani borasida xabarlar tarqalmoqda.

Mavzuga doir: Suvga gʻarq boʻlgan millionlar…

Kuni kecha MOQda bunday noxush holatlarning sababini oʻrganish va kelajakda ularning oldini olish yuzasidan uchrashuv boʻlib oʻtdi, deya xabar qilmoqda MOQ matbuot xizmati.

Unda Sportni rivojlantirish vazirining oʻrinbosarlari Shahrullo Mahmudov hamda Murod Ismoilov, MOQ Bosh kotibi Oybek Kasimov, Qoʻmita raisi oʻrinbosarlari Ravshan Irmatov hamda Sherzod Tashmatov, shuningdek, federatsiya va assosiatsiyalarning rahbarlari, masʼul xodimlari, buxgalterlari va moliyaviy sarf-xarajatlarga javobgar mutaxassislari ishtirok etishdi.

Yigʻilishda yuzaga kelayotgan bunday vaziyatlarning oldini olish, ularning kelib chiqish sabablarini oʻrganish kun tartibidagi asosiy masala sifatida joy oldi.

Oʻz navbatida, Vazirlik va Qoʻmita mutasaddilari sportchilarimiz erishayotgan muvaffaqiyatlardan keyin sohada uchrayotgan bunday koʻngilsiz holatlar oʻzbek sporti imijiga salbiy taʼsir oʻtkazayotgani, barcha xodimlar oʻz ishlarini vijdonan bajarishlari lozimligini alohida taʼkidlashdi.

Shuningdek, masʼullarga davlat byudjetidan yoʻnaltirilayotgan mablagʻlarning maqsadli sarflanishini nazorat qilish boʻyicha topshiriqlar berildi.

Tadbir davomida davlatimizda qonun ustuvorligi, har qanday jinoyat uchun jazo muqarrarligi masʼullarga yana bir bor eslatilib, oʻzbek sportini bunday illatlardan tozalash, yoʻl qoʻyilgan xatolardan xulosa chiqarib, uni takrorlamaslik zarurligi bildirildi.

Mavzuga doir: Sport sohasida pullar yana talon-taroj qilindi

• MOQ
• Sport
• Talon-taroj