Bugungi kunda O‘zbekiston iqtisodiyoti tezkor global o‘zgarishlar va raqobat bosimi ostida barqaror o‘sishni ta’minlash vazifasi oldida turibdi. Shu bois mamlakatimizda sanoat, IT va moliya sohalarida texnologik transformatsiyani jadal rivojlantirish, mehnat unumdorligi va energiya samaradorligini oshirish, investitsiya va innovatsiyalarni faol jalb qilishga qaratilgan keng ko‘lamli dasturlar va islohotlar amalga oshirilmoqda. Ushbu kompleks chora-tadbirlar orqali 2026-yilda iqtisodiyotda yuqori o‘sishni ta’minlash, kapital bozori va raqamli startaplar sektori rivojlanishi, yashirin iqtisodiyot ulushini qisqartirish va mamlakatni global investitsiyalar uchun jozibador hududga aylantirish maqsad qilinmoqda.

Davlat Rahbarining navbatdagi Murojaatnomasida kelgusi yili iqtisodiyotda 6,6 foiz o‘sishni ta’minlab, yalpi ichki mahsulotni 167 milliard dollarga yetkazilishi maqsad qilinganligini ma’lum qildi.

Agar mehnat unumdorligi, energiya samaradorligi va tannarx bo‘yicha qattiq ishlansa, bu ko‘rsatkichni yanada oshirish uchun barcha imkoniyatlar bor. Shu bois, sanoatda “Unumdorlik va samaradorlikni ikki karra oshirish” dasturi boshlanishi ko‘zda tutilmoqda.

Iqtisodiyot va moliya vazirligi tomonidan mehnat unumdorligi va energiya samaradorligi bo‘yicha alohida loyiha amalga oshiriladi.

Ushbu loyihaga xalqaro moliya institutlaridan 200 million dollar kredit va grant jalb qilinib, sanoat korxonalari uchun xorijdan yuqori malakali texnolog va muhandislar olib kelinadi, biznes jarayonlari raqamlashtiriladi, energiya va boshqa xarajatlarni qisqartirish bo‘yicha auditlar o‘tkaziladi hamda ilg‘or texnologiyalar transfer qilinadi. Bu borada “To‘rtinchi sanoat inqilobi markazi” tashkil qilinadi.

Markaz negizida robototexnika, internet buyumlari, “aqlli fabrika” kabi “Industriya 4.0” yechimlarini sanoat korxonalarida joriy etish uchun “tartibga solish mexanizmi” yaratiladi.

Bunda, korxonalar yangi texnologiyalarni ishlab chiqarishga joriy qilishdan oldin ularni sinovdan o‘tkazish imkoniga ega bo‘ladi.

Akkreditatsiya, metrologiya va standartlashtirish sohalaridagi islohotlarimiz natijasida O‘zbekiston “Global sifat infrastrukturasi” indeksida so‘nggi ikki yilda 15 pog‘ona yuqorilab, 52-o‘ringa ko‘tarildi (185 ta davlat ichida).

Ular shunday mahsulotni o‘tgan yilga nisbatan oshirsa, ko‘paygan mahsulot hajmi qiymatining 5 foizi miqdorida subsidiya beriladi. Korxona mutaxassislarining ilmiy-tadqiqot va konstruktorlik ishlanmalaridan olgan daromadi soliqdan ozod qilinadi.

Ana shunday islohotlar orqali kelgusi besh yilda sanoatda mehnat unumdorligi 30 ming dollarga yetkaziladi va 1 ming dollarlik qo‘shilgan qiymat yaratishga ketadigan energiya sarfi 1,5 barobar kamaytiriladi.

Shavkat Mirziyoyevning Murojaatnoma davomida ma’lum qilishicha, bu yil IT, fintex, sun’iy intellekt kabi yo‘nalishlardagi mahalliy startaplarga xorijdan 270 million dollar investitsiya jalb qilindi.

Shuningdek, keyingi yildan “Raqamli startaplar” dasturini kengaytirib, “startap g‘oyasidan to eksportgacha” ko‘maklashadigan yangi tizimni yo‘lga qo‘yilishi aytildi. Bunda, xususiy startap markazlarini tashkil etish uchun Yoshlar jamg‘armasidan besh yil muddatga 5 milliard so‘mgacha foizsiz ssuda berilishi ta’minlanadi.

Oliygohlarning o‘zida qoladigan mablag‘larning 10 foizi ham inkubatsiya markazlarini rivojlantirishga yo‘naltiriladi. 

Bundan tashqari, Markaziy bankda Fintex ofisi va Innovatsion xab tashkil etilib, unga Singapurdan mutaxassislar jalb qilinadi. Bu orqali yiliga 15-20 ta fintex startapni tashqi bozorga olib chiqish, ularga jami 1 milliard dollar investitsiya jalb qilish imkoniyati yaratiladi.

Umuman, venchur fondlar, startaplar, fintex kabi yangi moliyaviy instrumentlar bozorini rivojlantirish, bu sohadagi barcha ishtirokchilar huquqlarini qonun bilan kafolatlab qo‘yish zarurligi ma’lum qilindi.

Shu sababli davlat Rahbari Parlament Hukumat bilan birgalikda “Muqobil investitsiya jamg‘armalari to‘g‘risida”gi qonunni 1-martgacha ishlab chiqishini bildirdi.

Murojaatnoma davomida davlat Rahbari iqtisodiyotda o‘sishni ta’minlash va sanoatni modernizatsiya qilish maqsadida mehnat unumdorligi va energiya samaradorligini oshirishga qaratilgan loyihalarni yo‘lga qo‘yishini ma’lum qildi. IT, fintex va sun’iy intellekt sohalarida startaplar va inkubatsiya markazlari qo‘llab-quvvatlanadi, venchur fondlar va moliyaviy instrumentlar rivojlantiriladi. Bundan maqsad – ishlab chiqarish quvvatlarini kengaytirish, raqamli va innovatsion texnologiyalarni targ‘ib qilish hamda xalqaro investitsiyalarni jalb qilish orqali sanoat va iqtisodiyotni yangi bosqichga olib chiqishdir.

• Murojaat
• Oliy Majlis
• Shavkat Mirziyoyev