Bu haqda prezident matbuot xizmati xabar qildi.

2026-yildan paxta-g‘alla, mevalar va dukkakli ekinlar bo‘yicha hosilni ixtiyoriy sug‘urtalash tizimini yo‘lga qo‘yish taklif etilmoqda. Ushbu tizim bo‘yicha sug‘urta mukofotining yarmi davlat byudjeti hisobidan qoplanadi.

Davlat tomonidan qo‘llab-quvvatlash tizimini soddalashtirish maqsadida Agrar sohada to‘lov agentligini tashkil etish rejalashtirilmoqda. U hozirda turli idoralar tomonidan taqdim etilayotgan 75 turdagi subsidiyani yagona raqamli platformada birlashtiradi.

Yagona agentlikning tashkil etilishi fermerlar uchun byurokratik to‘siqlar va qog‘ozbozliklarni sezilarli darajada kamaytirishi kutilmoqda. Prezident bu takliflarni ma’qulladi.

Iqtisodiyot va moliya vazirligi ma’lumotlariga ko‘ra, 2025 yilning birinchi yarmida davlat byudjetidan subsidiyalar uchun 14,96 trillion so‘m, shu jumladan, qishloq va suv xo‘jaligiga 797 milliard so‘m (2024 yilning shu davrida 467 mlrd so‘m edi) yo‘naltirilgan:

– g‘alla uchun lazerli yer tekislagichlar va don ekish seyalkalari xarid qilish uchun — 182 mlrd so‘m;

– Qishloq xo‘jaligini davlat tomonidan qo‘llab-quvvatlashga — 264 mlrd so‘m;

– paxta xomashyosi ishlab chiqaruvchilarni qo‘llab-quvvatlash uchun — 90 mlrd so‘m;

– Qishloq xo‘jaligi texnikasini sotib olish uchun ajratilgan lizing yoki kredit foizlarini qoplash uchun — 85 mlrd so‘m;

– Fermer xo‘jaliklari iste’mol qilgan elektr energiyasi tannarxini qoplash uchun — 64 mlrd so‘m;

– Qishloq xo‘jaligida suvni tejovchi texnologiyalarni joriy etish uchun — 73 mlrd so‘m;

– Nasldor chorva va parranda sotib olish uchun — 30 mlrd so‘m;

– Qoraqalpog‘istonda lazerli yer tekislagichlar xarid qilish uchun — 10 mlrd so‘m.

2024-yilda davlat byudjetidan subsidiyalar uchun jami 25,5 trln so‘m ajratilgan bo‘lsa, shundan 1 trln 65 mlrd so‘mi qishloq va suv xo‘jaligiga yo‘naltirilgan.

• O‘zbekiston
• Prezident
• Qaror
• qishloq_xo‘jaligi