Yangi yil arafasida Surxondaryo viloyati Boysun tumanidagi ko‘p asrlik tarix va boy madaniy merosga ega “Sayrob” mahallasiga rasman “Turizm qishlog‘i” maqomini tasdiqlovchi sertifikat topshirildi, – deb xabar qilmoqda “Dunyo” agentligi.

Uzbektourism.uz portalining ma’lumotiga ko‘ra, ming yillik tarixga ega “Sayrob” mahallasi o‘zining betakror tabiati, milliy urf-odatlari, an’anaviy me’morchiligi va boy madaniy merosi bilan mahalliy va xorijiy sayyohlar uchun jozibador hudud hisoblanadi. “Turizm qishlog‘i” maqomining berilishi hududda sayyohlik infratuzilmasini yana-da rivojlantirish, aholi bandligini ta’minlash, tadbirkorlikni qo‘llab-quvvatlash hamda milliy qadriyatlarni asrab-avaylashga ulkan hissa qo‘shadi.

Sertifikatni topshirish marosimida qayd etilganidek, mazkur tashabbus “Sayrob” mahallasining turizm salohiyatini to‘liq ro‘yobga chiqarish, hududni O‘zbekiston turizm xaritasida yana-da mashhur maskanga aylantirishga xizmat qiladi.

• Qishloq
• Surxondaryo
• Turizm