The Guardian gazetasining yozishicha, Venesueladagi voqealar AQSh siyosatining “Putinlashuvi”ga olib kelmoqda. Tramp endi xalqaro qoidalarni chetlab o‘tishga urinmayapti, balki ularni ochiqchasiga buzmoqda va buning oqibatlari Karakasdan ancha uzoqlarga yetib bormoqda.

“Maduroning qo‘lga olinishi rejasi ish berdi va aynan shu holat eng xavotirli signal hisoblanadi. Venesueladagi operatsiyaning muvaffaqiyati Trampning o‘zini jazodan xoli his qilish ishonchini kuchaytirdi va hududlar hamda resurslar ustidan nazorat o‘rnatish yo‘lida keyingi kuch ishlatishga yo‘l ochdi. Vashingtonning maqsadi adolat yoki demokratiya emas, balki Venesuela neftiga bo‘lgan qiziqish bo‘lib, bu haqda Trampning o‘zi ham ochiq gapirgan”, – deyiladi maqolada.

The Guardian ma’lumotlariga ko‘ra, yuz bergan voqealar allaqachon Eron va Daniya kabi davlatlar hukumatlarida xavotir uyg‘otmoqda. So‘nggi kunlarda Tramp AQSh Erondagi norozilik namoyishchilarini himoya qilishga tayyor ekanini bildirgan. Shuningdek, uning ma’muriyati Grenlandiyani “har qanday vosita yordamida” egallash bilan tahdid qilishda davom etgan. O‘tgan oy Daniya harbiy razvedkasi ilk bor AQShni “xavfsizlikka tahdid” sifatida rasman tilga oldi.

Bundan tashqari, shanba kungi matbuot anjumanida Tramp bu ro‘yxatga Kubani ham qo‘shib, “bu davlatdagi holat Venesueladagiga judayam o‘xshash” ekanini va AQSh “Kuba xalqiga yordam bermoqchi” ekanini aytdi. AQSh Davlat kotibi Marko Rubio esa Venesueladagi voqealardan so‘ng Kuba “xavotirlanishi kerak”ligini bildirdi.

“Dunyo tez sur’atlarda qoidalar tizimidan ta’sir doiralari raqobati tomon siljimoqda va bunda hal qiluvchi omil harbiy kuch bo‘lib bormoqda”, – deya xulosa qiladi nashr.

• AQSh
• Siyosat