“Keng ko‘lamli urushdan maqsad — faqatgina yangi hududlarni egallab olish emas”, — deb yozadi The Times. Nashrning ma’lum qilishicha, shuncha vaqtdan buyon tutqich bermayotgan tinchlik kelishuviga erishish umidida AQSh prezidenti Donald Tramp Kiyevga bosim o‘tkazmoqda. Uning rejasiga ko‘ra, Moskvaga butun Donbassni topshirish va shu yo‘l bilan Rojdestvoga qadar otashkesimga erishish ko‘zda tutilgan.

 Bu orada Kreml Ukraina o‘z qo‘shinlarini Donetsk oblastidagi mustahkamlangan shaharlar — Kramatorsk va Slovyanskdan olib chiqmaguncha janglar to‘xtamasligini ta’kidlamoqda.

 Agar Volodimir Zelenskiy Rossiyaga hududlarni topshirishni xohlasa ham, Ukraina Konstitutsiyasi bunday qarorni faqat umummilliy referendumdan keyin amalga oshirishni talab qiladi. The Times’ning yozishicha, urush sharoitida bunday referendum o‘tkazish juda qiyin, hatto imkonsiz hisoblanadi. Biroq, “Agar Kiyev bosib olingan hududlar ustidan Rossiya hokimiyatini rasman tan olmasdan, o‘z qo‘shinlarini Donbassdan olib chiqib ketsa, referendumga ehtiyoj bo‘lmasdi”, — deb yozadi nashr.

“Tirik qayt” fondining yetakchi tahlilchisi Mikola Beleskov fikriga ko‘ra, agar Donbassdan chiqish buyrug‘i berilsa, harbiylarning bir qismi unga bo‘ysunmasligi mumkin. Bu esa milliy birlik uchun kutilmagan oqibatlarga olib kelishi ehtimoldan xoli emas. “Ukrainaliklarni asossiz imtiyozlarga majburlash, ayniqsa, tuprog‘i uchun 11 yildan ortiq jang qilayotganlar uchun milliy haqorat sifatida qabul qilinishi mumkin”, — dedi u.

Rossiya armiyasi hozirda Luhansk oblastining deyarli barchasi va Donetskning 80 foizidan ortig‘ini nazorat qilmoqda. Putin esa, agar Ukraina taslim bo‘lmasa, butun Donbassni egallashini da’vo qilmoqda. Lekin Beleskov ta’kidlashicha, Kramatorsk va Slovyansk uchun bo‘ladigan janglar Moskva uchun o‘n minglab qurbonliklar evaziga yuz beradi. Uning so‘zlariga ko‘ra, agar Ukraina Donbassdan voz kechadigan bo‘lsa ham, Kreml urushni to‘xtatmasligi ehtimoli katta.

“Rossiya nuqtayi nazariga ko‘ra, bu rejalarning barchasi — chinakam tinchlik kelishuvi emas, balki, Ukrainada ichki bo‘linishlar yaratish va undan keyingi muzokaralar chog‘ida yana-da mustahkamroq pozitsiyalarga ega bo‘lish uchun hujumlarni davom ettirish yo‘lida foydalanish”, — dedi Beleskov.

Nashrning yozishicha, Moskva bir necha bor Ukrainaga qilingan bosqin faqat hududlar uchun emasligini ochiq bildirgan. Kremlning asosiy maqsadi — urushning “asosiy sabablari”ni bartaraf etish, ya’ni Kiyevdagi g‘arbparvar hukumatni yo‘qqa chiqarishdan iborat. Shuningdek, Rossiya Ukrainaga NATOga a’zo bo‘lish imkonini bermaslik va uning armiyasi hajmini cheklashni talab qilmoqda.

Shu bilan birga, hozir xorijda yashayotgan Rossiyaning sobiq bosh vaziri Mixail Kasyanovning ta’kidlashicha, Vladimir Putin G‘arb davlatlari tomonidan Donbassning to‘liq Rossiyaniki deya e’tirof etilishini o‘zining shaxsiy maqsadlaridan biri deb bilib, unga qattiq yopishib olgan.

“Bu uning sha’ni va hokimiyatiga hurmat masalasi, toki hech kim uni ojiz deb o‘ylamasligi kerak”, — degan Kasyanov.

• Kiyev
• Kreml
• Putin
• Rossiya
• Tramp
• Ukraina
• Zelenskiy