O‘zbekistonda pirotexnika buyumlarining noqonuniy savdosiga qarshi choralar kuchaytirilmoqda. Yangi qonunga ko‘ra, bunday huquqbuzarliklar uchun jarimalar keskin oshirilib, eng kam jarima BHMning 15 baravari – 6,18 mln so‘m, eng yuqorisi esa BHMning 25 baravari – 10,3 mln so‘m etib belgilandi. 

2025-yil 29-iyulida Qonunchilik palatasi tomonidan qabul qilingan, 1-noyabrda esa Senat tomonidan ma’qullangan “Pirotexnika buyumlarining muomalasi to‘g‘risida”gi Qonun kuchga kirdi. Ushbu qonundan ko‘zlangan asosiy maqsad pirotexnika buyumlari muomalasi bilan bog‘liq munosabatlarni huquqiy tartibga solish va fuqarolar xavfsizligini ta’minlashdir. 

Mazkur qonunga asosan, Ma’muriy javobgarlik to‘g‘risidagi kodeksning 185-1-moddasi birinchi qismiga o‘zgartirish kiritildi. Unga ko‘ra, sanksiyadagi “besh baravaridan yigirma baravarigacha” degan so‘zlar “o‘n besh baravaridan yigirma besh baravarigacha” degan so‘zlar bilan almashtirilgan. 

Endi MJtKning 185-1-moddasiga ko‘ra, ushbu huquqbuzarlikni sodir etgan fuqarolar uchun jarima miqdori BHMning 15 baravari (6,18 mln so‘m)dan 25 baravarigacha (10,3 mln so‘m)ni tashkil etadi. Amaldagi tahrirga ko‘ra, jarima BHMning 5 baravaridan 20 baravarigacha. 

Qonunga ko‘ra, pirotexnika buyumlari – tarkibidagi moddalarning yonishi (portlashi) yordamida optik, akustik, elektr va boshqa vizual effektlar hosil qilish uchun mo‘ljallangan qurilmalar hisoblanadi. Ular jumladan atrof-muhitning shikastlanish darajasiga qarab I-V xavflilik sinflariga bo‘linadi. 

Xavflilikning I sinfiga kiruvchi pirotexnika vositalari, ya’ni bengal mayoqchalari, stol fontanlari, xlopushka kabi xavfli hudud radiusi 0,5 metrdan oshmaydigan pirotexnika buyumlari erkin muomalada bo‘lishi aniq qayd etilgan. Mazkur sinfga kiruvchi pirotexnika buyumlarini ishlab chiqarish, ularni saqlash, foydalanish va boshqa turdagi harakatlar uchun hech qanday taqiq bo‘lmaydi. II-V xavflilik darajasiga ega bo‘lgan pirotexnika buyumlari esa – taqiqlanadi.

Qonun rasmiy e’lon qilingan kundan 3 oy o‘tgach kuchga kiradi.

• Jazirama
• Pirotexnika
• Qoidabuzarlik
• Qonun