“O‘zbekneftgaz” AJ jamiyatga tegishli AYoQShlarda Ai-80 markali benzinining narxini 6500 so‘m qilib belgilaganini ma’lum qilmoqda.

“Benzin taqchilligini oldini olish va uning narxlarini arzonlashtirish borasida “O‘zbekneftgaz” AJ, Monopoliyaga qarshi kurashish qo‘mitasi va “Tovar xomashyo birjasi” AJ hamkorligida chora-tadbirlar ishlab chiqildi”, – deyiladi “O‘zbekneftgaz” xabarida.

Tashkilot matbuot xizmatining ma’lum qilishicha, “O‘zbekneftgaz” AJga qarashli AYoQShlarda bugun, 17 dekabr kunidan boshlab “AI-80” markadagi benzin 6890 so‘mdan arzonlashtirilib, har bir litri uchun 6500 so‘m narxda sotuvga chiqarilgan.

“Respublika hududidagi “O‘zbekneftgaz” AJning barcha AYoQShlarda benzin shu belgilangan narxda sotilishi ta’minlanadi”, – deyiladi xabarda.

“O‘zbekneftgaz” mazkur tadbirni so‘nggi paytlarda ijtimoiy tarmoqlarda benzin taqchilligi sabab turli tanqidiy muhokamalar bo‘layotgani bilan izohlagan.

Eslatib o‘tamiz, avvalroq Xabardor.uz birja savdolariga qo‘yilayotgan Ai-80 benzinining narxlari nega “o‘ynayotgani” va bundan nega oddiy aholi jabr ko‘rishi kerakligi haqida katta material e’lon qilgan edi.

Shuningdek, birja savdolarida benzin narxining shakllanishi bilan bog‘liq jarayonlar qanday kechayotganiga oid brokerlar ishtirokida suhbat uyushtirilgan edi. 

Bundan tashqari “O‘zbekneftgaz” AJ o‘z mahsulotini (Ai-80 markali benzinni) birja savdolariga bir sessiya va bir kontrakt bilan emas, balki turli kontraktlarda sotuvga qo‘yayotgani sun’iy taqchillikni keltirib chiqarayotgani haqida ham material e’lon qilingan edi.

• Benzin
• Birja
• Monopoliya
• neft
• qiziqarli