Sergeli tumani sudi tomonidan 14-avgust kuni Avtotuning.uz avtoservisi xodimi bo‘lib ishlayotgan Kia haydovchisi 2-yilga transport vositalarini boshqarish huquqidan mahrum qilib, 3-yilga ozodlikdan mahrum qilgan edi. Bunga sabab esa uning poyda vaqtida  yo‘lovchini urib yuborgani va jabrlanuvchining vafoti sabab bo‘lgandi.

Sud-tibbiy ekspertiza xulosasiga ko‘ra, marhum qo‘shma jarohat, bosh miya ochiq jarohati, kalla gumbazi va asosi suyaklarining bo‘laklanib sinishlari, bosh miya lat yeyishi, bosh miya to‘qimasi va pardalari ostiga qon quyilishlari, ko‘krak qafasi va qorin yopiq sinishlari, o‘pkalar lat yeb yorilishlari, ingichka ichak tutqichi lat yeb yorilishi, o‘ng boldir suyaklari o‘rta-pastki uchligidan ochiq sinishlari, chap boldir suyaklari pastki uchligidan yopiq sinishlari, bosh, ko‘krak qafasi orqa yuzasi, o‘ng kaft va o‘ng boldir sohalari ezilib-yirtilgan yaralari, bosh, yuz, tana, qo‘l va oyoq sohalari ko‘plab teri shilinmalari kabi jarohatlar olgan. Sud qarorida qayd etilishicha, haydovchi bir qator yo‘l harakati qoidalarini buzgan holda 60−70 km/soat tezlikda piyodani urib yuborgan.

Ayblanuvchining advokati apellyatsiya shikoyati bergan. Shundan so‘ng, birinchi instansiya sudi tomonidan jabrlanuvchi qonuniy vakilining da’vosi yo‘qligi, shuningdek, ayblanuvchining aybiga iqror va qilmishidan pushaymonligi, muqaddam sudlanmagani, oilada yagona boquvchi ekani inobatga olinmaganini ta’kidlagan.

Qayd etilishicha, Toshkent shahri prokuraturasi bo‘limi boshlig‘i o‘rinbosari M.Komilov esa suddan shikoyatni qanoatlantirmaslikni so‘ragan.

Biroq jinoyat ishlari bo‘yicha Toshkent shahri sudi sudyasi Muzaffar Ahmedov raisligidagi sudlov hay’atining 12-sentyabr kuni bo‘lib o‘tgan yig‘ilishida qamoqda saqlangan 4 oy 2 kun jazodan chegirilib, o‘tash uchun qolgan 2-yil 7 oy 28 kunlik ozodlikdan mahrum qilish jazosi shartli hisoblangan va 2-yil sinov muddati belgilangan.

TA’kidlanishicha, sudlanuvchi nazorat organining ruxsatisiz O‘zbekiston hududidan chiqishi taqiqlanadi va yashash yoki o‘qish joyi o‘zgargani to‘g‘risida xabardor qilishi, shuningdek, ichki ishlar organlarida ro‘yxatdan o‘tishi shart.

Hozirda unga nisbatan qo‘llangan qamoqqa olish tarzidagi ehtiyot chorasi bekor qilinib, u sud zalidan ozod etilgan.

• Avtopoyga
• Haydovchi
• O'lim