Belarusda 10-sinf o‘quvchilari uchun harbiy-amaliy tayyorgarlik dasturi kengaytirilmoqda. Yangi dastur doirasida o‘quvchilarga uchuvchisiz uchish apparatlarini boshqarish, qizlarga esa taktik tibbiyot asoslari o‘rgatiladi. Bu haqda Belarus ta’lim vaziri o‘rinbosari Aleksandr Kadlubay ma’lum qildi.

Uning so‘zlariga ko‘ra, 10-sinf o‘quvchilari uchun ishlab chiqilgan dasturda dronlarni boshqarish bo‘yicha 10 soatlik amaliy kurs mavjud. Qizlar uchun tibbiy tayyorgarlik dasturi ham kengaytirilib, unga taktik tibbiyot elementlari kiritilgan.

“Amaliy mashg‘ulotlar hajmini oshirdik. Sof nazariyadan real sharoitlarda zarur bo‘ladigan aniq ko‘nikmalarga o‘tdik”, — dedi Kadlubay.

Maktablarda harbiy-vatanparvarlik yo‘nalishi kuchaymoqda

Belarusda ta’lim tizimini harbiylashtirish jarayoni ham kuchayib bormoqda. Joriy yildan 10-sinf o‘quvchilari uchun 10 kunlik o‘quv-dala yig‘inlarida qatnashish majburiy etib belgilangan.

Shuningdek, maktabgacha ta’lim muassasalarida “harbiy-vatanparvarlik” yo‘nalishidagi guruhlar, maktab va kollejlarda esa shu yo‘nalishdagi klublar tashkil etilmoqda.

Bu o‘zgarishlar Belarusda harbiy-amaliy ko‘nikmalarni yoshlar ta’limining bir qismiga aylantirish jarayoni kuchayayotganini ko‘rsatmoqda.

Belarusda harbiy tayyorgarlik kuchaymoqda

So‘nggi oylar davomida Belarusda harbiy tayyorgarlik va mudofaa infratuzilmasiga e’tibor kuchaygan.

Iyul oyida Aleksandr Lukashenko uning buyrug‘i bilan maxsus operatsiya kuchlari Ukraina chegarasi bo‘ylab joylashtirilganini ma’lum qilgan. 2026-yil boshidan buyon mamlakatda 43 ta bombapanoh ham qayta tiklangan.

Iyun oyida Belarus Mudofaa vazirligi Polsha va Litva bilan chegaradosh Grodno viloyatida harbiy mashg‘ulotlar o‘tkazgan. Unda fuqarolar va transport vositalarini safarbar qilish bo‘yicha harakatlar ham sinovdan o‘tkazilgan.

Bundan avval Rossiyaning Belarus hududidan Ukrainaga qarshi yangi front ochish va NATOga qarshi dron hamda gibrid operatsiyalar uchun foydalanishni ko‘zlayotgani haqida xabarlar tarqalgan edi. Lukashenko esa Belarus Ukrainaga qarshi urushga qo‘shilishni istamasligini bildirgan.