Organizmning me’yorda ishlashi uchun vitaminlar zarur organik birikma hisoblanadi. Biroq ularning qay biri tanada qanday vazifa bajarishini bilasizmi?

Mutaxassisning fikricha, inson salomatligida ushbu organik birikmalarning o‘rni beqiyos. Misol uchun, A vitamini hujayralarning rivojlanishi, terining ko‘rkamligi, sochlar go‘zalligi, tirnoqlar salomatligi, ko‘rish quvvatining kuchli bo‘lishi, suyaklar mustahkamligi, yurak-qon tomir, nafas olish va reproduktiv tizimlarning yaxshi ishlashi va tashqi ta’sirlardan himoyalanishni ta’minlaydi.

Ushbu vitamin sabzi, sitrus mevalari, jigar, pishloq, tvorog, sut, tuxum, baliq va petrushkada ko‘p bo‘ladi. D vitamini esa tanada kalsiy va fosforning so‘rilishini tartibga soladi. Shuningdek, u suyaklar mustahkamligi, qonning me’yorda ivuvchanligi, shamollashdan himoyalanish, zaharli moddalarning organizmdan chiqib ketishi, yaxshi kayfiyat va yurak-qon tomirlar salomatligi uchun zarur.

Bu vitamin baliq yog‘i, echki suti, sariyog‘, pishloq, tvorog, tuxum sarig‘i, dengiz mahsulotlari, kartoshka, o‘simlik yog‘i, mol go‘shtida bisyor. Shuningdek, organizmda quyosh nuri ta’sirida ajralib chiqadi.
C vitamini — terining go‘zalligi, kuchli immunitet, soch va tishlar sog‘lom bo‘lishi uchun kerak. U ko‘proq sitrus mevalari, sabzi, qizil karam, shivit, na’matak, chakanda moyi (oblepixa), qizil rangli mevalar, yashil no‘xat, turp va kivida mavjud.

K vitamini — tanadagi jarohatlarning tez bitishi, qon sifati va uning ivuvchanligi me’yorda bo‘lishiga yordam beradi. U karam, sabzi, ismaloq, qichitqi o‘t, na’matak, pomidor, qulupnay va ko‘k choyda mavjud.

Y vitamini — gormonlar hosil bo‘lishi, qon ivishi, asab to‘qimalari va immunitetni mustahkamlash, reproduktiv tizim faoliyatining yaxshi ishlashi, tashqi salbiy ta’sirlardan himoyalanishni ta’minlaydi. U asosan kungaboqar va zaytun yog‘i, go‘sht, qovoq, jo‘xori, sariyog‘, yong‘oq, sut mahsulotlari va jigarda bor.

B1 — organizmda uglevodlar almashinuvi, asab tizimi va miya uchun energiya ishlab chiqarish, jismoniy faollikni oshirishga yordam beradi. U don mahsulotlari, dukkaklilar va kartoshkada ko‘p miqdorda bo‘ladi.

B2 — hujayralarga energiya ishlab chiqarish, ko‘z va teri salomatligi uchun zarur. Ushbu vitamin sut va sut mahsulotlari, jigar, bodom, tuxum, qo‘y go‘shti, qo‘ziqorin, grechka va tvorogda mavjud.

B6 — oqsillar so‘rilishi, asab tizimining yaxshi ishlashi va qon tomirlari sog‘lom bo‘lishi uchun kerak. U banan, ko‘k salat, yong‘oq, karam, bug‘doy kepagi va yangi undirilgan nihollari, losos balig‘i hamda go‘shtda bo‘ladi.

B12 — asab tizimi va ichaklar salomatligi, mustahkam xotira hamda immunitet va qizil-qon hujayralari ishlab chiqarish uchun zarur. U salat, turli baliq mahsulotlari, sut, pishloq, tuxum sarig‘ida ko‘p uchraydi.

Biotin — organizmda uglevod va yog‘lar sintezi, metabolik jarayonlarning faollashishida ishtirok etadi. U asosan jigar, sut mahsulotlari, soya, dukkaklilar, yong‘oqda bor.

Foliy kislotasi — yangi hujayralar o‘sishi va anemiyaning oldini oladi. U turli ko‘katlar, no‘xat, mol go‘shti va jigari, buyrak va tuxumda ko‘p miqdorda bo‘ladi.

Unutmang! Har qanday vitaminni faqat shifokor tavsiyasi bilangina qabul qilish zarur. Mutaxassis kishining yoshi, jinsi, sog‘lig‘i, turmush tarzi va boshqa omillarga qarab, qaysi vitaminlarni qancha miqdorda ichish bo‘yicha ko‘rsatma beradi.

• Vitamin
• salomatlik