Hindistonning Goa shahrida shaxmat bo‘yicha Jahon kubogi o‘z yakuniga yetdi.

Ushbu nufuzli musobaqada dunyoning turli mamlakatlaridan 200 nafardan ortiq shaxmatchi bosh sovrin uchun kurash olib bordi. 

O‘zbekistonlik shaxmatchi Javohir Sindarov bellashuvlarning finaliga qadar yetib bordi. Hal qiluvchi bahsda Sindarovga xitoylik Vey Yi raqiblik qildi. 

Mazkur qarama-qarshilikning dastlabki ikki partiyasi durang bilan yakunlangandi. Yakunda bugun g‘olib tay-breykda aniqlandi. 

Tay-breyk yakuniga ko‘ra, Javohir Sindarov 1,5 : 0,5 hisoblarida g‘alaba qozondi va Jahon kubogi g‘olibiga aylandi. 

Ma’lumot uchun, Javohir Sindarov mazkur musobaqa davomida Nikita Petrov (Chernogoriya), Nikolas Teodoru (Gretsiya), Yu Yangyi (Xitoy), Fredrik Svane (Germaniya), Xose Martines Alkantara (Meksika), Nodirbek Yakubboyev (O‘zbekiston) kabi shaxmatchilarni yengib, finalga qadar yetib keldi. 

G‘alaba orqali Javohir Sindarov 120 ming AQSh dollariga ega bo‘ldi. 

Sindarov 2026-yilning mart oyida Kiprda o‘tkaziladigan nomzodlar turnirida ishtirok etadi. 

• Hindiston
• Jahon kubogi
• Shaxmat