Ai-Da dunyodagi birinchi ultrarealist rassom-robot hisoblanadi. Uni Eydan Meller va Engineered Artse mutaxassislari tayyorlagan.

Sotheby’s kimoshdi uyi Ai-Da rassom-roboti yaratgan portretni savdoga chiqaradi, deb xabar beradi CNN.

Ai-Da bionik qo‘llari va ko‘zlaridagi kameralar yordamida rasm chizadi. Robot dasturchi ayol Ada Lavleys sharafiga Ai-Da deb nomlangan. Robot chizgan suratda matematik Alan Tyuring tasvirlangan. Sotheby’s polotno uchun 120-180 ming dollar qo‘lga kiritishni rejalashtirgan. Auksion 31-oktyabr kuni ochiladi.

Ai-Da o‘z ishi yirik kimoshdi uyi tomonidan sotuvga qo‘yilgan birinchi rassom-robotga aylanadi. Kartina, shuningdek, 2024-yilning mayida BMTga namoyish etilgandi.

“Mening ishlarim Birlashgan Millatlar Tashkilotining sun’iy intellektdan mas’uliyat bilan foydalanish borasidagi tamoyillariga mos keladi — Alan Tyuring ham buning tarafdori edi”, — deydi muloqot uchun SIning ilg‘or til modelidan foydalanadigan robot.

• Auksion
• Lifestyle
• qiziqarli
• rassom
• sun’iy intellekt